Am-polony ny jiolahy voatifitra

05/02/2013

Nandritra ny tatitra nataony mikasika ny asan’ny Polisim-pirenena tany Toamasina no nanambaran’ny filohan’ny fikambanana “Tsimanavaka” fikambanan’ny polisy ny FIP Toamasina, Rakotomalala Diminique Marie-Paul, fa “taona tena mafy ho anay FIP iny taona nivalona iny, na teo amin’ny asa izany na teo amin’ny fahamaroan’ny polisy tra-doza am-perin’asa noho ny fitandroana ny filaminana ary koa ny tafiditra fahasahiranana koa izahay noho ny krizy iainan’ny firenena”.

Nomarihany manokana fa nahatratra am-polony ireo polisy voatifitry ny jiolahy tamin’iny taona lasa iny rah any tany Toamasina no resahina. Nambarany ihany koa fa mampiasa fitaovana mifandanja amin’ny fampiasan’ny mpitandro ny filaminana avy ao amin’ny polisim-pirenena, “Kalachnikov” sy ny “fusil a pompe” ary PA ny an-kamaroan’ireo jiolahy amin’izao fotoana izao.
Na teo aza anefa izany fahasahiranana izany dia nanambara ity tompon’andrikitra ity fa taona nahita vokatra ho an’ny ekipan’ny FIP Toamasina iny taon-dasa iny, ary napetraka mandrakariva ny filamatra hoe izay sahy tsy maintsy mandresy. Ankoatra izay, dia nambaran’ny officier de police Rafaliarivo Jules komandin’ny FIP Toamasina, fa nahatratra 30 ireo jiolahy rain-dahany maty voatitra noho ny fifanandrianany tamin’ny polisin’ny FIP nandritra iny taona lasa iny; “Isan’ny nitondra filaminana teto Toamasina ny fandraisanay andraikitra tamin’ny nahafaty ireo jiolahy ireo, na betsaka aza ny fanakihanana izay saika nanakivy ireo polisy. Raha vao niandoha iny taona lasa iny dia efa raharaha fakana an-keriny, fanafihana mitam-piadiana mpanam-bola sy mpivarotra heverina fa misy vola, ary famakiana magazay misy jirofo sy raharaha andramena no nalaza teto” hoy ny fanamarihan’ity tompon’andrikitra ity. Mbola ity taona vao nosantarina ity dia naneho ny fahavononan’izy ireo amin’ny iraka nampanaovina azy ireo polisin’ny FIP any Toamasina. “Ny tanjonay dia ny filaminan’ny tanana, fahandriampahalemana ho an’ny Malagasy, ary ny fiarovana ny vahoaka sy ny fananany”, hoy hatrany officier Rafaliarivo Jules nisolo tena ireo namany FIP ao Toamasina.
Marihina fa tamin’ny sabotsy teo no notanterahana ny lanonana fifampiarahabana tratry ny taona teo amin’ny fianankaviamben’ny FIP tany Toamasina.