Nafindra ao Antanimora

06/02/2013

Tsy any amin’ny fonjan’i Toamasina intsony I Rakotomalala Henri na Riribe mpitarika ny hetsiky ny « tsy misy miala aketo niany » tao Toamasina. Nafindra ao amin’ny fonjan’Antanimora ity voafonja ity araka ny fanazavan’ny tompon’andraikitry ny fonja any Toamasina. Marihina fa betsaka ny resaka nandeha mikasika ity raharaha ity satria nandritra ny fandalovan’ny ekipan’ny CST Ramaroson Alain mitarika ny fanadiadiana parlemantera no nitranga ny raharaha. Ny fanazavana ofisialy kosa no nilaza « noho Rakotomalala Henri na Riribe saika hitarika fikomiana teo amin’ireo voafonja tao Ambalatavoahangy » no nahatonga ny famindrana azy tany Antanimora.

Raha ny fanazavana azo dia ny alakamisy 31 janoary dia nampivory ireo voafonja isaky ny efitrano i Rakotomalala Henri, izay nilaza tamin’ireo voafonja fa « tsy handray baikon’ny mpandraharaha ny fonja isika manomboka rahampitso (ndlr :zoma 01 febroary), raha tsy avoakan’izy ireo ny fanen-tsazy nolazan’ny filohan’ny tetezamita nandritra ny fifampiharabana tratry ny taona teny Iavoloha farany teo. Efa nahazo izany ny tao Antananarivo, ka nahoana isika eto no tara sy tsy mety mivoaka ». Ny fanazavana teo anivon’ny fitsarana ao Toamasina hatrany no nahalalana fa « mbola tsy namoaka ny didim-panjakana milaza ireo fepetra mikasika ny fanenan-tsazy nambaran’ny filohan’ny tetezamita io ny minisiteran’ny fitsarana, ary mbola tsy nisy voafonja na iray aza manerana ny Nosy ka nahazo izany noho io didim-panjakana tara io ». Mba tsy hisian’ny fikomiana eo anivon’ny fonjan’Ambalatavoahangy sy ny fahavakisan’ny fonja amin’izao andro sarotra izao, dia « noraisinay ny fepetra ny alakamisy atoandro tamin’ny 01ora namindrana an’i Rakotomalala Henri ho any amin’ny fonjan’Antanimora Antananarivo, sady hanamarinany ny zavatra nambarany no hisorohana ny zavatra mety hitranga izay tsy hampisy filaminana eto Toamasina », hoy Ralay Christian mpitantanana ny fonjaben’i Toamasina. Ankoatra izay, dia 1.010 ny isany voafonja eo ao Ambalatavoahangy ankehitriny, ny 655 amin’izany ireo miandry fitsarana, ka isan’izany Rakotomalala Henri, izay isany ihany koa mahasorena azy sy efa nifadiany hanina in-telo tao anatin’ny telo volana mahery kely nihazonany azy, noho ny tsy fihetsehan’ny antontan-taratasy eo anivon’ny fitsarana Toamasina, na efa vita nandritra ny fialan-tsasatry ny fitsarana teo ny fanadiadiana lalina mikasika ny raharaha.