Tonga eto Madagasikara ny sekretera jeneraly

07/02/2013

Mivahiny any Toamasina amin’izao fotoana izao ny sekretera jeneralin’ny Fikambanamben’ny Ladoany maneran-tany n any OMD (Organisation mondiale des Douanes) Kunio Mikurna. Nijery ifotony ireo asa notohanan’ny OMD nandritra ny 8 taona tao amin’ny ladoany any Toamasina ity vahiny ity sy ny mpiara-dia aminy. Ny fanohizana ny fanovana rafitra sy ny fanatsarana ny fotodrafitrasa izay voalaza fa apetraka ho tanjona amin’ity taona ity no votoatin’ny fihaonana teo amin’ny vahiny sy ny tompon’andrikitry ny Ladoany any Toamasina.

Efa hatramin’ny taona 2005 no efa nisy fiaraha-miasa akaikky teo amin’ny Vondron’ny ladoany maneran-tany, OMD, sy ny Ladoany Malagasy. Hijery ifotony ireo dingana vita tamin’ireo fiaraha-miasa teo amin’ny an-daniny sy ny an-kilany, indrindra ny momba ny fanovan-drafitra efa natomboka tao amin’ny sampandraharahan’ny ladoany no antondian’ny delegasiona tarihan’ny sekretera jeneralin’ny OMD izay tsy iza fa ilay teratany japoney Kunio Mikurna mivahiny hatry ny omaly any Toamasina.
Nasongadin’ny andaniny sy ny ankilany tamin’ny fihaonana ny lanjan’ny seranan-tsambon’i Toamasina izay miantoka ny 2/3 ny fampidiran-ketra ara-fadintseranana eto Madagasikara. Nambaran’ny tale jeneralin’ny Ladoany, Vola Rafindramiandra fa “mitovy laharana amin’i Ban Ki Moon i Kunio Mikurna, ka tombony betsaka ho antsika sy ho an’ny ladoany Malagasy ny fahitany ny asa natao teto Madagasikara tao anatin’ny valo taona izay notohanan’ny Vondron’ny ladoany maneran-tany. Isan’izany ny fanofan-drafitra sy fanovana ny fomba fiasa ary fanarahana ny fenitry ny fandintseranana iraisam-pirenena”. Tetsy an-danin’izany nanambara kosa ny sekretera jeneralin’ny OMD fa vonona ny hanatsara ny fomba fiasan’ny ladoany Malagasy ny vondrona iraisam-pirenena; ka hisy ny fanofanana mpiasa hanamafisana ny traikefany, ny fanatsarana ny fitaovana ampiasaina ary ny fametrahana an’i Madagasikara ho ivon’ny fifanakalozana noho ny toerana stratejika ara-pifanakalozana azy eo amin’ny afrika sy azia ary moyen-orient ary ireo nosy aty amin’ny ranomasim-be indiana.
Ankoatra ny ladoany Toamasina dia nitsidika ny orinasa Ambatovy ihany koa ny delegasiona avy amin’ny OMD omaly talohan’ny fihaonana manokana izay niarahan’izy ireo tamin’ireo mpandraharaha tsy miankina any Toamasina. Tamin’izany no nitondran’izy ireo fanazavana mikasika ny fomba fiasan’ny OMD sy ny fepetra tsy maintsy arahina amin’izao fampifandraisana azy amin’ny ladoany maneran-tany izao, hanamorana ny fanaraha-maso ny entana mifanakalo. Nisy ihany koa ny fitsidihana ara-pomba fanajana ny lehiben’ny Faritra Atsinanana Mahavimbina Alain. Nambaran’ity farany fa zava-dehibe amin’ny Faritra Atsinanana ny fitsidihana satria manamarika ny fisokafan’ny Malagasy amin’ny sehatra maneran-tany izany ary hanokatra ihany koa fankotoavana ny firenentsika eo amin’ny sehatra iraisam-pirenena.