“Mila vola be ny Kly Charles” , hoy i Lylyson

08/02/2013

Nanamarika ny datin’ny 7 febroary 2009 ny fitondrana HAT, daty manan-tantara amin’ny fiainam-pirenena noho ny rà latsaka sy ny aina nafoy. Samy manana ny fomba fijeriny manodidina iny raharaha iny ny tsirairay avy. Nomelohan’ny Fitsarana ny filoha teo aloha, Marc Ravalomanana ary ireo manamboninahitra tamin’izany fotoana, toa ny jeneraly Raoelina.Tokony hotsaraina koa ireo nitarika ny olona hananika ny lapam-panjakana, hoy ny avy amin’ny Fanoherana, sns. Maro ny adihevitra sy ny resaka mandeha taorian’ny horonantsary mirakitra ny “ampamoaka” nataon’ny kolonely Charles Andrianasoavina, indrindra ny zava-boalazany nandritra ny fidirany mivantana tetsy amin’ny Magro Behoririka omaly. Nitondra fanazavana manodidina izany ny kolonely Lylyson Urbain de René, lehiben’ny FIS.

La Nation (+): Inona no olana eo aminao sy ny kolonely Charles?
Lylyson (-): “Tiako ho marihana ety am-boalohany fa ny tenako no niady hahazoan’ny kolonely Charles fiaramanidina, hitondra azy hotsaboina any ivelany amin’ny maha “promo” azy. Tao anaty fahasahiranana tanteraka ny kolonely Charles tamin’izany fotoana noho ny olana ara-pahasalamana izay mahazo azy. Noraisiko ho adidy ny fanampiana araka izay tratra sy izay tandrify ny tena tamin’ny fitsaboana ity “promo” ity. Mbola anatin’ny fahasahiranana tanteraka ny tenany hatramin’izao. Mila vola be ny saran’ny fitsaboana ary eo indrindra no olana mipetraka mahatonga ireny karazana fanambarana maro samy hafa navoakan’ny kolonely Charles ireny”.

(+): Tsy mitombona àry ve izany ny “ampamoaka” nataon’ny kolonely Charles?
(-): “Mino aho fa tsy avy amin’ny fony ireny zavatra hambarany etsy sy eroa ireny fa vokatry ny fahasahiranana mahazo azy araka ny efa nambarako tetsy ambony. Mila vola be tokoa ny kolonely Charles amin’ny fitsaboan-tenany. Misy manararaotra izany fahareseny izany ka mamporisika azy hiteniteny foana ho tambin’ny vola homena azy. Mampalahelo ihany anefa ny fihetsika hasehon’ny kolonely Charles ary maro amin’ny zavatra nambarany mba tsy hilazako hoe izy rehetra no lainga sy resaka noforonina, hanomezana fahafaham-po ireo izay manamby vola amin’izany fahasahiranany izany. Ilay “sens de l’honneur” amin’ny maha manamboninahitra azy mihitsy no voahitsakitsaka. Tiako ny milaza etoana fa nangataka fihaonana tamiko ireo miaramila niara-dia tamin’ny kolonely Charles teny amin’ny CAPSAT. Te-hihaona amin’ny CEMGAM izy ireo hitatitra sy hamaly ny zavatra nambaran’ny kolonely Charles”.

(+): Vavolombelona nanatrika ny zava-misy rehetra mandra-pahatongan’ny fotoana nandosiran’ny filoha teo aloha Marc Ravalomanana ny kolonely Charles. Niara-dia hatrany koa ianareo tamin’ireo hetsika maro teto amin’ny firenena.
(-): “Izay indrindra no nilazako teny ambony fa maro loatra ny resaka ataon’ny kolonely Charles. Horaisiko avy hatrany ny fisamborana ireo manamboninahitra niaraka tamin’ny filohan’ny antoko MFM, Manandafy Rakotonirina. Nizotra tamim-pilaminana ny asa natao; porofon ‘izany tsy nisy fahasimbana na fitifirana mihitsy tao amin’ny Carlton. Efa vita daholo ny zava-drehetra vao tonga ny kolonely Charles ary dia ireny fisintonana vozon’akanjo hitan’izao tontolo izao ireny no nataony. Toraka izany koa ny tao amin’ny HCC, raha tsy hitanisa afatsy ohatra vitsivtsy ny tenako. Efa vita avokoa ny andraikitra rehetra nankinina tamin’ny FIS vao nihazakazaka namonjy anay tao ny kolonely Charles. Mbola azo jerena amin’ny tahirin-tsary sy horonantsary ihany koa ny zava-nitranga tao amin’ny Episcopat Antanimena. Iza no nisetrasetra tamin’ny pasitera Lala Rasendrahasina; iza kosa no namonjy ireo manamboninahitra nomen’ny filoha teo aloha ny fahefana miaramila? Voatery mamaly ireny fiampangana ireny ny tenako na dia tsy tiako loatra aza amin’ny maha manamboninahitra ahy. Tafahoatra ny fihetsika ataony; manararaotra ny fahavoazany rahateo koa ny sasany, amin’ny fanambazana vola azy amin’izao tsy fahasalamana manjo azy izao. Tsy mbola nahafantatra ny filoha Rajoelina ary tsy mbola nihaona taminy akory aho ny datin’ny 7 febroary araka ny nambaran’ny kolonely Charles”.

(+): Ny teninao farany
(-): “Aleo hifanatrehana ny resaka ary vonona hanao “face-à-face” aminy aho; izay no mba hangatahako amin’ny kolonely Charles. Mahavariana ihany mantsy ny zava-misy. Fa nahoana àry no tsy nambarany ho ren-tany ren-danitra, tamin’ny fotoana mbola nampalaza izany komandà Charles izany ny taona 2009, ireny voalazany tanaty horonantsary sy teny amin’ny Magro ireny raha tena mitompo teny fantatra amin’ny fahamarinan’izany ny tenany? Koa satria ve tsy nahazo izay tombotsoa nantenainy ho azo avy tamin’ny alalan’ireny fisehosehoana mamohafady maro nataony ireny ny kolonely Charles, dia miampanga ny “promo” taminy tahaka izao? “Lâcheté” tsotra izao no fandikako ny fihetsika ataony; mampalahelo kanefa atao ahoana”.