Maro ireo vahiny tsy ara-dàlana

08/02/2013

Araka ny loharanom-baovao teny anivon’ny mpitandro filaminana sy ny fitsarana tany Toamasina dia ahitana tera-tany vahiny maro dia maro tsy manana fazoan-dàlana honina eto Madagasikara any an-toerana amin’izao fotoana izao. Mpitondra fanjakana na mpanao politika no miaro azy ireo amin’izany ka sarotra ny fampiharana ny làlana. Ny sinoa sy ny frantsay no maro amin’izy ireo. Isan’ny ahitana vahiny mampiahiahy nefa tsy afaka enjehina ihany koa ao anivon’ny orinasa Ambatovy. Vazaha frantsay iray sy siona iray ary afrikanina tantsimo iray no noroahina teto Toamasina nandritra ny telovolana farany tamin’ny taon-dasa noho izy ireo tsy nanana taratasy ara-dàlana afahany monina eto”.

Izay no nambaran’ny tompon’andrikitra iray tao amin’ny fitsarana any Toamasina raha nilaza ny zava-misy momba ireo tera-tany vahiny any an-toareba ny tenany. Mbola ity loharanom-baovao ity ihany koa no nanamarika fa “betsaka ireo tera-tany vahiny tsy manara-dalana tokony norohaina tamin’ny taona lasa, saingy manana mpiaro matanjakana toy ny mpanao politika sy olom-panjakana ny ankamaroan’izy ireo”. Tranga mampiseho ny fisian’ny gaboraraka amin’ny fanomezana fazoan-dàlana hipetrahan’ireo vahiny any amin’ity tanana ity ireo voalaza ireo. Araka ny loharanom-baovao ihany dia toy izao no fomba fanaon’ireo vahiny ireo rehefa te-hahazo fazoan-dàlana hipetraka ao Toamasina. “Visa touristique” latsaky ny 30 volana izay tsy andoavam-bola no entin’izy ireo miditra any an-toerana. Mifandray amina olom-panjakana hahazoana ny antontan-taratasy maharitra izy ireo aorian’ny fandoavana vola sy filazana fa mpandraharaha izay fanaon’ireo tera-tany frantsay sy ireo tera-tany sinoa. Mazava loatra fa na fanamarinana ny fisian’ny fametrahana fangatahana eny anivon’ny fanjakana na “certificat de dépôt” aza no avoakan’ny distrikan’i Toamasina I dia ampy ahafahan’izy ireo mipetraka maharitra ao Toamasina izany.

Mahazo karapanondro malagasy

Etsy an-danin’izany, nambaran’ny loharanom-baovao misy amin’ireo vahiny monina maharitra ao Toamasina ireo no mahazo ny karapanondro Malagasy aorian’ny fahazoany io taratasy miainga amin’ny distrikan’i Toamasina I io. Ohatra amin’izany ny tera-tany frantsay iray izay nahazo karapanondrom-pirenena tao Mangabe Maroantsetra ny 21 desambra 2012, izany hoe lasa tera-tany Malagasy kanefa efa 48 taona no nampiasany karapanondro sy pasipaorony frantsay. Marihina fatsy nisy na antontan-taratasy iray aza milaza ny maha-malagasy azy afa-tsy ny fananany zom-pirenena malagasy nalaina teo anivon’ny fitsarana ambaratonga voalohany tao Maroantsetra.
Marihina ihany koa fa maro amin’ireo tera-tany sinoa izay vao tonga any Toamasina ary milaza fa mpandraharaha amin’ny sehatry ny varotra no mahazo izany atontan-taratasy izany ihany koa na dia mbola latsaky ny iray volana aza ny nahatongavany. Ankoatr’izay dia isan’ny miditra amin’ny fakana fotsiny io “certificat de dépôt” na fanamarihana ny fametrahana fangatahana fazoan-dàlana honina eto Madagasikara io ihany koa ireo mpiasa vahiny ao Ambatovy. Nambaran’ny loharanom-baovao fa “manana mpiaro ara-panjakana sy mpanao politika izy ireo amin’izany, ka na heloka fandikan-dalana tsotra noho ny fehezan-dalana famaizana Malagasy aza no hanenjehana azy dia tsy mampiraika azy izany. Indrandray aza dia toy ny fanjakana kely ao anaty fanjakana mihintsy ny ao Ambatovy satria tsy azo hidiran’ny tompon’andraikim-panjakana any an-toerana raha alalana manokana amin’Ambatovy ny raharaha momba ireo mpiasa vahiny ao aminy. Porofon’izany ny fananany seranam-piaramanidina manokana izay tsy ahafahana manaraha-maso ireo vahiny “tsy ara-dalana” ao aminy.