Mitaky fanapariaham-pahefana tena izy

09/02/2013

Nanatontosa fivoriana ho azy ireo manokana tany Nosy be ireo Lehiben’ny faritra rehetra manerana ny Nosy. Nandritra izany fivoriana izany no nahafahan’izy ireo nifampizara traik’efa amin’ny zava-misy any amin’ny faritra iadidiany isan’isany avy. Isan’ny nisongadina tamin’izany ny fahatsapan’ny rehetra fa tsy mandeha araka ny tokony ho izy ny fampiharana ireo làlana momba ny fanapariaham-pahefana eto Madagasikara. Nisy arak’izany ireo vahaolana naroson’ireo lehiben’ny faritra mba hahatomombana izany fanapariaham-pahefana izany.

Sambany hatramin’izay nanendrena azy ireo amin’ny toeran’ny maha lehiben’ny Faritra no nanao fivoriana ho azy ireo manokana ireo lehiben’ny Faritra manerana ny Nosy. Tany Nosy be no nanatanterahana izany fivoriana izany, izay nifarana omaly. Tonga nanatrika sy nanome voninahitra ny fihaonana ny minisitry ny Fanapariaham-pahefana Ruffine Tsiranana sy ireo tompon’andrikitra ambony ao amin’izany ministera izany. Miisa 13 kosa ireo lehiben’ny Faritra nandray anjara tamin’ny fivoriana, akoatr’ireo izay nandefa solon-tena.
Nisongadina tamin’ity fivoriana ity ny fijerena ny zava-misy mahakasika ny fampandehanan-draharaha eny anivon’ny faritra isan’isany avy miohatra amin’ny làlana manan-kery manandrify ny fanapariaham-pahefana. Tamin’ny alalan’izany no nahitan’ny mpandray anjara fa saika mitovy avokoa ny zava-misy amin’ireo faritra samihafa manerana ny Nosy momba izay fanapariaham-pahefana izay. Araka ny fitarainan’ireo lehiben’ny Faritra dia tsy voaaja ny ankamaroan’ireo làlana momba izany fanampariaham-pahefana izany. Raha atao amin’ny teny hafa dia mbola mivangongo aty amin’ny fahefana foibe hatramin’izao ny ankamaroan’ny fahefana rah any mifanohitra amin’izany no voafaritry ny làlana manan-kery. Ohatra amin’izany ny mikasika ny tamberim-bidy avy amin’ireo orin’asa vaventy toy ireo mpitrandraka harena an-kibon’ny tany izay lasan’ny fanjakana foibe avokoa fa tsy misy miditra amin’ny kitapom-polan’ny faritra. Mbola maro ihany koa ankoatr’izay ny fanampahan-kevitra izay atao teny midina avy aty amin’ny fitondrana foibe. Raha fintinina dia tondroin’ireo lehiben’ny faritra ho mbola tsy vonona na minia tsy miraharaha ny fampiharana araka ny tokony ho izy ny làlana mifehy ny fanapariaham-pahefana ny governemanta. Ankoatr’izay dia isan’ny olana niraisan’ireo faritra isan’isany avy ihany koa ny tsy fahampian’ny fotodrafitrasa afahana manatontosa ny asa antsakany sy an-dàvany. Mitaky ny hampiharana an-tsakany sy an-davany ireo làlana mifehy ny fanapariaham-pehefana arak’izany ny lehiben’ny faritra manerana ny Nosy. Nisy ihany koa ny vahaolana naroson’izy ireo afahana manatenteraka izany.
Marihina fa omaly no nifarana ity fivoriana tany Nosy be ity ary nifanome toky ireo lehiben’ny faritra nandray anjara tamin’ny fivoriana fa hatao isam-bolana ity fivoriana ity mba afahana mandray fanampahan-kevitra iombonana manandrify ireo olana izay iraisan’ny faritra isan’isany avy.