Mivarotra tanindrazana an-tsokosoko

11/02/2013

Miantso ny vahoaka Malagasy hanara-maso akaiky ary handray fanampahan-kevitra manoloana ny fihetsiky ny fitondrana tetezamita ny fikambanana “Collectif Tany”. Tondroin’izy ireo ho manararaotra ny fahefana eo am-pelatanany hivarotana ireo velaran-tany samihafa amina mpanambola avy any ivelany, ary amin’ny fomba maro samihafa, ny fitondran-dRajoelina. Tsy mazava ihany koa araka ny fanambarana nataon’ny “Collectif Tany” ireo fifanarahaha nahafahan’ireo orin’asa goavana mahazo velera-tany lehibe eto Madagasikara. Notsiahivin’izy ireo fa tsy afaka mamatotra an’i Madagasikara amina fifanarahana goavana toy izany ny fitondrana tetezamita.

Gaboraraka ny fitantanana ny fananan-tany eto Madagasikara. Izay no tsapa avy amin’ny tatitra miendrika antso avo nataon’ny fikambanana “Collectif Tany”, manoloana ny fihetsiky ny Fitondrana tetezamita izay manararaotra ny fasahiranam-bahoaka sy ny fitodihana amin’ny fifidianana ka manao izy danin’ny kibony amin’ny fivarotana velaran-tany amina orin’asa goavana avy any ivelany. Ambaran’izany fanambaran’ny “Collectif tany” izany fa maro dia maro ny lahatsoratra mivoaka amin’ny alalan’ny gazety iraisam-pirenena izay maneho mibaribary ny tolo-bidy ataon’ny fitondrana tetezamita antsokosoko any ivelany any. Iray amin’ireny ny fiantsoana ireo mpampiasa vola iraisam-pirenena hiasa eto Madagasikara, eny anivon’ireny atao hoe « réserves foncières touristiques » ireny izay nivoaka tamin’ny gazety iraisam-pirenena tamin’ny volana oktobra 2012. Hita tao amin’izay antso nataon’ny fitondrana tetezamita izany fa « réserves foncières touristiques » miisa 21 izay manana velarana 8 800 ha no efa voafaritra hatramin’izao. Voalaza tao anain’izany antso nataon’ny fitondrana tetezamita izany ihany koa ny fahafahan’ireo mpampiasa vola mividy tany eto Madagasikara araka ny voalazan’ny lalàna 2007-036 izay iarahan’ny be sy ny maro mahalala fa tsy azon’ny fitondrana tetezamita tanterahina amin’ny maha fitondrana tsy ara-dàlana azy.


Ankoatr’izay dia isan’ny hametrahan’ny « Collectif Tany » ahiahy ihany koa ilay tetikasa fantatra amin’ny anarana hoe « le grenier de l’Océan Indien » izay vao notokanana sy nindraindraina fatratra vao tsy ela akory izay. Tetik’asa izay afahan’ireo mpanam-bola avy any ivelany mampiasa ny volany eto Madagasikara eo amin’ny sehatry ny fambolena ary hazoan’izy ireo velaran-tany afahany manao izany asa izany. Marihina fa tamin’ny volana jona tamin’ny taona lasa dia efa nisy orin’asa vaventy avy any ivelany efa nahazo fankatoavana sava-ranonando tamin’ny fitondrana tetezamita hampiasa ny volany eto amintsika eo amin’ity sehatra ity. Fantatra anefa fa tsy nisy fifampiresahana tamin’ireo tantsaha sy mponina voakasika mivantana amin’izany asa izany akory hatramin’izao. Antony hanairan’ny « Collectif Tany » ny sain’ny be sy ny maro mba tsy hiverenan’ny zava-misy any amin’ireo orin’asa mpitrandraka harena an-kibon’ny tany toa an’Ambatovy sy QMM izay ahiatana disadisa tsy an-kijanona amin’ny mponina any an-toerana.

Fantatra ihany koa, araka ny tatitry ny « Collectif Tany » ihany, fa tsy niala teto Madagasikara araka ny niheverana azy akory ireo orinasa goavana izay nanenjehana an-dRavalomanana ka nahatonga ny fionganany teo amin’ny fitondrana. Isan’izany ilay orinasa vahiny avy any Inde fantatra amin’ny anaranna hoe VARUN. Arak’io tatitra io dia mbola manao ny ataony eto Madagasikara ity orinasa ity saingy mihafina aorianan’ny anarana hafa. Torak’izany koa ny orinasa
« Madagascar Future Entreprise » izay tsy iza sampan’ny orinasa « Daewoo Logistics ». Nilaza ity orinasa ity fa efa tsy eto Madagasikara intsony izy ireo hatramin’ny taona 2009 kanefa mbola io orinasa io no mamboly katsaka any amin’ny faritra andrefana. Manao ranolava anefa ny fitarainan’ny mponina any an-toerana amin’ny hakelin’ny karama sy ny fanararaotana ataon’izany orinasa izany. Isan’ny tetik’ady hampiasain’ny ny fitsinjarana ny velaran-tany alainy amin’ny faritra kely. Izany dia mba hanehoana amin’ny rehetra fa tsy maka velaran-tany maro izy ireo. Rehefa jerena anefa dia velaran-tany madinikia maro no alainy. Izany hoe toy ny maka velaran-tany goavana iray ihany ilay orinasa.

Mbola isan’ny ohatra amin’ny fikasan-dratsin’ny fitondrana tetezamita ihany koa ny antso nataon’ny lehiben’ny faritra Boeny mba hisian’ny fampiasambola ataon’ny vahiny amin’ny fambolem-bary any Marovoay. Eo ihany koa ny antso nataon’ny CEDE (Centre d'études diplomatiques et stratégiques) tany Chine izay niantso ireo mpampiasa vola vaventy tany amin’ity firenena ity hampiasa ny volany amin’ny sehatry ny fambolena sy ny fananan-tany eto Madagasikara.

Paik’ady ampiasain’ny fitondrana tetezamita avokoa ireo rehetra ireo, raha araka ny fahitan’ny “Collectif tany”, mba ahafahany misarika ireo mpampiasa vola hividy velaran-tany amin’ny fomba samihafa eto Madagasikara. Nambaran’ny “Collectif Tany” ihany koa fa mety hanafina izay fiksan-dratsy izany ny fikarakarana ny fifidianana izay misarika ny sain’ny mpanara-baovao maro ka tsy ahitan’izy ireo an’izany paik’ady ratsy izany.