Tsy hanolotra kandidà raha tsy tafaverina an-tanindrazana

11/02/2013

Niantso ny mpiara-dia aminy tsy hanao teny manafintohina ny hafa ny filoha teo aloha Ravalomanana Marc. Niantso azy ireo haneho firaisan-kina ihany koa ny tenany ary nanambara fa ho avy ny fotoana ilazany ny daty hiverenanany eto Madagasikara. Nambarany ihany koa fa mivory any Maputo ny Troika handinika izay fanampahan-kevitra ho raisina. Nifampiarahaba nohony fahatratrarana ny taona vaovao ny ankolafy Ravalomanana ny sabotsy teo tany Amboanjobe.Nandritra izany fotoana izany no nanamafisan-dRavalomanana ny tsy hanolorany kandidà amin’ny fifidianana hatao eto Madagasikara raha tsy efa tonga eto Madagasikara ny tenany.

Tsy nasian’ny filoha teo aloha resaka ny fiatrehan’ny Ankolafy Ravalomanana ny fifidianana. Nionona tamin’ny filazana fa mankato ny fanemorana ny datim-pifidianana ny tenany nandritra ny fidirany an-telefaonina tamin’ny sabotsy teo teny Amboanjobe, toerana nanaovan’ny mpomba azy lanonana fifampiarahabana tratry ny taona vaovao. Ankoatr’izay dia niantso ny mpiara-dia aminy samy hieritrerita sy handinika tsara hivoahana amin’izao krizy ny filoha teo aloha. “Ny Ankolafy Ravalomanana, hoy izy, dia vonona mandrakariva amin’ny fitandroana ny fandriampahalemana indrindra ny famerenena ny ara-dalàna. Tsy misy fampandrosoana hoy ihany ny filoha teo aloha, raha tsy misy fitoniana sy fifamelana ary miresaka ny samy Malagasy”.
Akoatr’izay dia nanentana ny ankolafy Ravalomanana hanamafy ny firaisankinan’izy ireo ny filoha teo aloha. “Ny hafatra tiako apetraka aminareo dia tsarovy ity teny ity hoe izay mitambatra vato fa izay misaraka fasika. Fotoana firaisankina sy hiomana tsara izao, noho izany dia manome toky anareo aho ary ianareo manome toky ahy fa tsy maintsy mandresy isika. Ny vahoaka Malagasy dia mahalala izay olona tiany hitondra azy”, hoy hatrany ny fanambaran’ny filoha teo aloha.
Isan’ny notsindriany mafy ary naverimberiny nandritra ny antso an-telefaonina nataony ihany koa ny amin’ny tokony tsy hisian’ny fifandranitana. Tandremo tsara, hoy izy, ny teny tafahoatra mba tsy hisy teny hanafintohina ny hafa, teny am-pahendrena, am-panajana no tokony hataon’ny Ankolafy Ravalomanana.
Nasian-dRavalomanana resaka kely ihany koa ny fiverenany an-tanindrazana. “Aza matahotra ianareo fa tsy maintsy tonga I Dada”. Izay no teny nentiny nankahery ireo mpiara-dia aminy. Nambarany ihany koa fa misy fivorian’ny Troika any Maputo amin’izao fotoana izao ary mandinika ny raharahan’i Madagasikara izy ireo amin’izany.
Marihina fa mbola namafisian’ny filoha teo aloha fa tsy hanolotra kandida amin’ny fifidianana eto Madagasikara ny Ankolafy tarihiny raha tsy efa tonga aty Madagasikara ny tenany.