Mifampiandry kendritohana

12/02/2013

Tsy ady mangatsiaka intsony fa tena ady mafana ny misy eo amin’ny Filohan’ny tetezamita sy ny Praiminisitra Lehiben’ny Governemanta. Efa mibaribary tanteraka amin’izao fotoana izao ny fifanenjehana eo amin’ny roa tonta, amin’ny alalan’ireo mpomba azy sy ireo mpampita vaovao avy amin’ny an-daniny sy ny an-kilany, izay tsy mifampitsitsy amin’ny teny avoaka sy ny fifanaratsiana. Ahiana mafy arak’izany ny hampitatra ity raharaha ity amin’ny ratsiratsy kokoa, satria efa misy mihintsy ny manoso-kevitra ny amin’ny tokony hitarihana vahoaka hihazo ny lapam-panjakana eny Mahazoarivo ho fanerena ny fialàn’ny Praiminisitra Lehiben’ny Governemanta.

Mihorohoro ny vahoaka manoloana ny fivoaran’ny disadisa misy eo amin’ny Filohan’ny Tetezamita sy ny Praiminisitra Lehiben’ny Governemanta. Azo itarafana izany avy hatrany ny teny navoakan’ny Filohan’ny tetezamita nandritra ilay fandaharana manokana tamin’ny TVM sy TVplus izay nilazany fa manan-jo tanteraka ny hanala ny Praiminisitra eo amin’ny toerany ny tenany. Fanambarana izay toy ny fampitandremana miantefa mivantana any amin’ny Lehiben’ny Governemanta. Mazava loatra nanaraka izany avokoa ireo loharanom-baovao mpmba ny filohan’ny tetezamita izay samy mivoy ny amin’ny tsy famendrehan’ny Praiminisitra hanohy ny fitantanana ny Governemanta avokoa amin’izao fotoana izao. Etsy an-kilan’izany, iaraha mahita ihany koa fa tsy manaiky lembenana manoloana izany fampohorohoroana izany ny ekipan’i Mahazoarivo izay efa sahy milaza fa efa “ancien homme fort de la transition” ny filohan’ny tetezamita.
Hanafika an’i Mahazoarivo?
Tsy mijanona amin’izay fifandranitana an-gazety sy amin’ny alalan’ny fitaovan-tserasera izay ihany anefa ny fifamelezana eo amin’ny an-daniny sy ny an-kilany. Araka ny loharanom-baovao dia efa mitatra amin’ny fifandrahonana ihany koa ny raharaha amin’izao fotoana izao. Araka izany loharanom-baovao izany die efa misy mihintsy ny sosokevitra avy amin’ny mpomba ny Filohan’ny tetezamita ny hitarihana vahoaka hihazo ny lapam-panjakana eny Mahazoarivo mba hanerena ny Praiminisitra hametra-pialana satria sarotra ho an’ny filohan’ny tetezamita ny manala ny Lehiben’ny Governemanta amin’ny toerany noho izy tohanan’ny Fianankaviambe iraisampirenena taorian’ny fifanarahan’ny tondrozotra. Voalazan’ny loharanom-baovao ihany koa fa efa misy mihintsy amin’izao fotoana izao ny fifampiresahana amin’ireny zatovo be sandry avy eny amin’ny tanana ambany izay mety handray anjara.
Mampiahiahy arak’izany ity raharaha tsy fifankazahoana eo amin’ny Filohan’ny tetezamita sy ny Praiminisitra lehiben’ny Governemanta ity satria mety hisy fiantraikany ratsy dia ratsy eo amin’ny fizotran’ny tetezamita sy ny fivoahana amin’ny krizy ireo. Betsaka ihany koa ny mihevitra fa mbola isan’ny paik’ady ampiasain’ny sasany mba hanitarana araka izay azo atao ny tetezamita izao fifandroritana izany, indrindra hampandamoka ny firosoana amin’ny fifidianana.