Andramena telo kamiao no tra-tehaka

12/02/2013

Nahatratrarana andramena tao anaty gony maromaro izay nentina fiara venenty miisa telo tany amin’ny tanàna iray atao hoe Ambakirano ao amin’ny distrikan’Ambilobe. Araka ny fantatra dia avy any SAVA ireto hazo sarobidy ireto. Tsy fantatra kosa ny toerana saika hitondrana azy. Tazonina ao Ambilobe amin’izao fotoana izao ireo mpamily sy ny fiara ary ireo andramena nentiny. Taorian'ny fahatratrarana andramena tao Vohémar, faritra Sava, vao tsy ela akory izay dia nahatratrarana hazo sarobidy telo kamiao indray tao Ambakirano ao amin’ny distrikan’Ambilobe. Teo amin’ny lalana mankany Vohémar no nahatratrarana izany ny alahady 10 febroary teo. Tamin'ny alalan’ny vaovao azo tamin'olona tsara sitra-po no nahafantarana ny fisian’izany kamiao nitondra andramena izany.

Ny Dref na ny talem-paritry ny rano sy ny ala any an-toerana, Simona Arsène, no nidina tamin’izany faritra izany niaraka tamin’ny lehiben’ny distrikan’ Ambilobe ,Tokely Justin ary mpitandro filaminana
avy any Antsiranana nijery ny zava-misy.
Hatreto dia mbola tsy fantatra mazava tsara ny isan'ireo andramena tsy ara-dalana ireo satria efa notapatahina natao tao anaty gony avy izany. Efa mandeha kosa nyfamotorana mahakasika izany, ary ireo kamiao telo ireo dia efa voatazona ihany
koa. Aorian'izany famotorana izany no ahafantarana izay tena tompon’ilay kamiao sy ireo andramena ireo.
Ny mahagaga ny mpanara-baovao amin'ity tranga farany ity dia ny fahitana fa tao amin'ny distrikan’ Ambilobe no nahatratrarana ireo hazo sarobidy ireo. Iaraha-mahalala anefa fa tsy manana andramena ny ao amin’izany distrikan’Ambilobe izany. Marihina ihany koa anefa fa tsy sambany akory no nahatratrarana na koa nahitana tranga tahaka izao tao Ambilobe. Aiza ho aiza ary ny fandraisana andraikitra sy ny fanaraha-maso ataon'ireo manam-pehefana tandrify izany tamin'ny toerana niavian'ireo hazo saro-bidy ireo ka nahatonga azy ireo ho any Ambilobe ? Fantatra ihany koa etsy an-danin’izany fa raràn'ny lalana ny fanondranana sy ny fitaterana ny andramena manerana ny tanin’ny Madagasikara.
Marihina fa tamin’ny fotoana nanoratana ny vaovao dia mbola tsy nahavitana tatitra an-tsoratra (procès verbal) ity raharaha ity. Fantatra kosa kosa anefa fa voasambotra ny kamiao sy ireo andramena tsy fantam-piaviana ireo. Ity tranga ity dia mbola manamafy fa mirongatra izay tsy izy ary mbola tsy ahitam-panafana hatramin’izao ny fikapana sy ny fivarotana tsy ara-dàlana ireo hazo sarobidy eto Madagasikara.