Nitombo isa ireo mangataka hitam-basy

13/02/2013

Niakatra ny isan’ny mponina sivily nangataka fazoan-dàlana hihazona fitaovam-piadiana ho fiarovan-tena sy fiarovam-pananana raha ny zava-nisy tany amin’ny distrikan’Ambatondrazaka no jerena. Ireo mpamboly vary no betsaka mangataka izany fazoan-dàlana hitana basy izany, raha araka ny fanazavan’ny tompon’andrikitra ao amin’ny biraon’ny fiarovana any an-toerana. Betsaka torak’izany ihany koa ny manavao ny fahafahany mitam-basy isan-taona. Tamin’ny fotoanan’ny fampiakarana ny voka-bary no tena naha-betsaka azy ireo, antony ilazana fa tsy mahatoky ny fahafahan’ny mpitandro filaminana miaro azy sy ny fananany ireo tantsaha any an-toerana.

Tsy mahatoky ny mpitandro filaminana intsony ny mponina sivily, indrindra ireo tantsaha. Hita taratra izany amin’ny fitomboan’isan’ireo izay mangataka fazoan-dàlana hihazona fitovam-piadiana any an-tokatranony. Ho an’ny distrikan’Ambatondrazaka manokana dia teo anelanelan’ny volana jona ka hatramin’ny volana Oktobra tamin’ny taon-dasa no tena nahitana mponina sivily maro nangataka izay fazoan-dàlana hihazona basy izay. Raha araka ny fanazavana nataon’ny tompon’nandrikitra ao amin’ny biraon’ny fiarovana ao amin’izany distrika izany dia nahatratra hatramin’ny 29 ny isan’ny nangataka fazoan-dàlana hitana basy tany an-toerana, raha tsy nahatratra ny ampahaefatr’io ny isan’izy ireo tamin’ireo taona hafa tany aloha. Ireo mpanana tanimbary sy manana voka-bary no betsaka tamin’ireo nangataka fahazoan-dàlana hitana fitaovam-piadiana ireo.
Tsara ny manamarika fa iray amin’ireo endriky ny tsy fandriam-pahalemana izay mahazo vahana any amin’iny faritra iny amin’ny fotoanan’ny fararano ny halatra vary eny an-tanimbary. Isan-taona dia tsy vitsy ireo voka-bary mbola eny an-tanimbary no lasibatr’izany asan-jiolahy izany, indrindra ny an’ireo izay tsy manana mpiambina. Araka ny loharanom-baovao dia mitondra fiara vaventy mihintsy ireo jiolahy tamin’ireo tranga sasantsasany niseho tany an-toerana. Ankoatry ny firongatry ny hala-bary tany amin’iny faritra iny dia mety azo heverina ho antony nahatonga ny fiakaran’isan’ny mpangataka hitam-basy ihany koa ny firongatry ny tsy fandriam-pahalemana izay mahazo vahana any amin’iny faritra iny, indrindra taorian’ny fisian’ireo fitrandrahana vatosoa tany an-toerana.
Marihina fa tsy afa-nanome ireo karazam-basy eny an-tanan’ny sivily nahazo alalana hihazona izany tany amin‘ny biraon’ny fiarovana teny an’ivon’ny distrika ny mpanao fanadihadiana. Nambarany anefa fa tsy mitovy amin’ny fitaovam-piadiana azon’ny mpitandro filaminana ampiasaina ny fitaovam-piadiana azon’ny mponina sivily tazonina. Tsara ny mampatsiahy fa efa tamin’ny taona 1969 ny làlana mifehy ny fahafahanan’ny mponina sivily mitam-basy eto amintsika.