Mitaky ny mangarahara

24/10/2012

Tsy namoaka na anaran’olona izay voarohirohy amin’ny raharaha famotsiam-bola ny SAMIFIN na dia izay mangarahara izay aza no tena andrasan’ny vahoaka avy amin’ny. Nilaza anefa ny tale jeneralin’ity rafitra ity fa manara-maso akaiky ireo mpitondra ambony amin’izao tetezamita izao sy ireo mpanao politika, indrindra ireo izay mikasa ny hilatsaka amin’ny fifidianana hatao eto amin’ny firenena ny SAMIFIN na ny Sampan-draharaha Malagasy Iadiana amin'ny Famotsiambola. Nambarany ihany koa fa firenena vitsivitsy dia i Emirats Arabes Unis, I Thailande, Maurice ary i Frantsa no fiavian’ny vola maloto izay misy manadio eto Madagasikara. Efa maro hoy ihany ity tale jeneralin’ny SAMIFIN ity, ireo voarohirohy ary nametrahan’izy ireo fitoriana teny amin’ny Fitsarana saingy mahagaga fa vitsy dia vitsy no voatsara.

Tsy azo lavina ny fisian’ny famotsiam-bola maloto izay mandalo eto Madagasikara raha ny fanazavana izany nataon’ny tale Jeneralin’ny SAMIFIN (Sampan-draharaha Malagasy Iadiana amin'ny Famotsiambola) no jerena. Na izany anefa dia tsy sahy namoaka anaran’olona na iray azan y tale jeneralin’ity rafitra ity, Razaranaina Jean Claude nandritra ny valandresaka ho an’ny mpanao gazety izay nataony omaly. Notsipihany anefa fa iitombo ihany koa, tato anatin’ny taona vitsy, ny isan’ireo izay ahina ho tompon’andrikitra amin’ny fanaovana izany famotsiambola izany eto amintsika. Nambaran’ity tompon’andraikitra voalohany ao amin’ny SAMIFIN ity fa raha tsy nisy afa-tsy 23 ireo voaroiroy ka nandefasana fitarainana teny amin’ny fitsarana, tamin’ny taona 2008, dia efa nahatratra 54 izany tamin’ny taona 2009, ary nahatratra 93 ny taona 2010. Nihemotra kosa izany tamin’ny taona 2011 satria tsy nisy afa-tsy 67 ny isan’ireo voaroiroy ka nandefasana fitarainana teny amin’ny fitsarana. Na maro toy izany aza anefa ireo izay voaroiroy dia vitsy ihany ireo notsaraina, raha araka ny tatitra nataon’ny Tale jeneralin’ny SAMIFIN. Antony nahatonga ny maro hametram-panontaniana mahakasika ny antony tsy hasahian’ity rafitra SAMIFIN ity manambara ampahibemaso ny anaran’ny olona izay voakasik’ity resaka famotsiam-bola ity eto amintsika, toy izay misy any amin’ny firenen-kafa. Satria ny tsy filazana izany dia midika fa mety ho lasa fitaovana fampihorohorona na fampitahorana fotsiny ihany, ary mety hampirongatra ny kolikoly mihintsy ity SAMIFIN ity.
Mbola ity tatitra nataon’ny SAMIFIN ity ihany koa no nanipika fa arahin’izy ireo maso amin’izao fotoana izao ireo mpitondra fanjakana eto amintsika, indrindra ireo mpanao politika sy ireo izay mihevitra ny hirotsaka ho fidina ho filoham-pirenena. Izany hoe ireto sokajin’olona ireto no tena voakasik’ity famotsiambola ity rah any eto amintsika no resahana. Tsy mahagaga arak’izany raha tsy marisika loatra amin’ny fanenjehana azy ireo ny fitsarana amin’izao fotoana izao.
Marihina fa miara-miasa amin’ny sehatra maro ny SAMIFIN amin’izay ady amin’ny famotsiambola izay. Voalohany amin’izany ireo ‘institutions financiers” (toy ny banky sy ny birao mpanakalo vola). Miara-miasa amin’izy ireo ihany koa ireo atao hoe “institutions non-financieres designees”. Ireo no manondro ireo izay ahiana ho manao famotsiam-bola. Ny SAMIFIN kosa avy eo no manatanteraka ny fikarohana ireo antony azo antoka ilazana fa misy trangana famotsiambola tokoa (indices sérieuses de blanchissement). Rehefa feno izany fepetra izany dia alefa eny an’ivon’ny fitsarana ny raharaha.
Ankoatr’ireo rafitra voalaza etsy ambony ireo dia miara-miasa amina rafitra eo amin’ny sehatra iraisam-pirenena momba ity famotsiam-bola ity ihany koa ny SAMIFIN. Isan’izany ny EGMONT izay tsy inona fa sampan’asa iraisampirenena miady amin’ny famotsiam-bola, izy. Firenena maro no mikambana ao amin’io sehatra io ary mahazo famatsiam-bola amin’izay asa manandrify ny ady atao amin’ny famotsiam-bola izay. Isika eto Madagasikara dia tsy isan’ny mpikambana akory fa mpiara-miasa fotsiny ihany, araka ny fanazavan’ny Tale jeneralin’ny SAMIFIN. Ny mbola tsy fananantsika lalana mifandraika amin’ny ady amin’ny asa fampihorohoroana no anton’izany. Marihina fa hatrany am-pamolavolana azy dia nampiarahana ny ady amin’ny famotsiambola sy ny ady amin’ny fampihorohoroana. Izay antony izay no mahazava-dehibe ny fananan’ny firenena lalana momba ny ady amin’izay fampihorohoroana izay. Nambaran’ny avy ao amin’ny SAMIFIN fa efa nisy ny volavolan-dalana nalefan’izy ireo teny an’ivon’ny parlemanta momba izay kanefa tsy nisy tohiny izany mandrak’izao. Mangataka ny mba handaniana izany volavolan-dalana izany ary ny SAMIFIN mba ahafahan’i Madagasikara mahazo ireo tombontsoa tokony ho azony hanamafisana izany ady amin’ny famotsiambola izany.