Mahatratra 700 tapitrisa ariary ny vola nisy nanodikodina

14/02/2013

Tamin’ny fanambarana izay nataony nandritra ny valan-dresaka ho an’ny mpanao gazety omaly no nilazan’ny tale jeneralin’ny Birao mahaleotena amin’ny ady amin’ny kolikoly na ny BIANCO, Faly Rabetrano, fa tao anatin’ny roa taona no nanaovan’izy ireo ny fanadihadiana mikasika ny fisian’ny fanodikodinambolam-panjakana tao an’ivon’ny primatiora lefitra miadidy ny Fahasalamana tamin’ny fotoana nitantanan’ny Profesora Alain Toandrazanarivelo. Loharanom-baovao hafa kosa no nahafantarana fa mahatratra 700 tapitrisa ariary ny volam-panjakana voahodina tao amin’ity ministera ity nandritra izany fotoana izany, ary miisa 6 ireo olona voaroiroy amin’izany.

Nambaran’ny tale jeneralin’ny Bianco ihany koa fa tsy maintsy tohizana ary alefa eny an’ivon’ny fitsarana ny fanadihadiana ireo olona voaroiroy amin’ity raharaha ity, ka isan’izany ny Praiminisitra lefitra teo aloha, sady mpikambana ao amin’ny Filankevitra avon’ny tetezamita, ny Profesora Alain Tehindrazanarivelo. Nambarany fa tsy amin’ny maha mpanolontsaina ambony azy no mahavoaroiroy an’ity mpanao politika ity fa noho izy tompon’nandrikitra voalohany tao amin’ny minisiteran’ny Fahasalamana tamin’ny fotoana nisian’izany fanodikodinam-bolam-panjakana izany. Marihina fa tsy manana fiarovana manokana (immunité) ny paremantera amin’izao fotoana izao noho izy ireo tsy voafidim-bahoaka, araka ny fanazavan’ny Jeneraly Faly Rabetrano. Nambarany ihany koa fa efa navoakan’ny Fitsarana avo momba ny lalam-panorenena ho fantatry ny be sy ny maro ny làlana momba izany tsy fananan’izy ireo fiarovana manokana izany.
Hitohy arak’izany ny raharaha hanenjehan’ny Bianco ny Praiminisitra lefitra teo aloha Alain Tehindrazanarivelo. Tsiahivina fa manohitra izany fanenjehana ny naman’izy ireo izany ny parlemantera maro ao amin’ny CST sy ny CT. Efa nisy ny fanambarana izay nataon’izy ireo. Raha jerena amin’ity valin-kafatra avy amin’ny Bianco ity anefa dia fantatra fa tsy nankatoavina izany fitakiana nataon’ny CST sy ny CT izany momba ny raharahan’ny Profesora Tehandrazanarivelo Alain.