Dokotera kolonely maty notifirina

15/02/2013

Asa na fifandrifin-javatra na tetika efa maty paika, fa nandritra ny andro vitsivitsy izay dia lasibatry ny andian-jiolahy mitam-basy ny tokatranona “officiers”, na avy ao amin’ny tafika izany na avy ao amin’ny polisim-pirenena. Ny tranga farany dia izay nanjo ny manamboninahitra mpitsabo miaramila izay namoy ny ainy noho ny tifitra nahazo azy, ny alin’ny alarobia nifoha alakamisy eto teny an-tokotaniny. Opération manamboninahitra sa asan-jiolahy toy ny mahazatra ihany. Io no fanontaniana apetraky ny maro manoloana ny tranga nisesisesy tato ho ato. Isan’izany ny zava-nitranga ny alin’ny alarobia hifoha alakamisy teo, tokony ho tamin’ny misasak’alina.

Andian-jiolahy miisa dimy no nanafika tranona mpitsabo miaramila iray (médecin-colonel) teny Nanisana. Maty voatifitra teo amin’ny fony ity farany. Toy izao no zava-niseho, araka ny loharanom-baovao. Efa niandry ity manamboninahitra ity tao an-tokotaniny ireto jiolahy ireto, satria tsy namaky ny trano avy hatrany izy ireo fa nijanona teny ivelan’ny trano niandry ny nahatongavan’ity mpitsabo ity. Marihina fa miasa ao amin’ny hopitaly CENHOSOA na hopitaly Soavinandriana ity miaramila mpitsabo ity. Raha araka ny tombatomban’ny manodidina, dia efa fantatr’ireto jiolahy io ora fodiany amin’ny alina io, ka nararaotiny izany hamelezana ilay kolonely. Noteren’ireo olon-dratsy hamoha ny trano avy hatrany ity farany, rehefa avy norahonany tamin’ny basy, izay nahitana kalachnikov iray. Rehefa tafiditra tao an-trano ry zareo dia ren’ny mpifanolo-bodirindrina, fa toa nisy ny fifamaliana sy tabataba isan-karazany. Avy eo, tsikaritry ny manodidina fa nivoaka ny trano ilay manamboninahitra. Raha ny faitan’ny manodidina dia toy ny saika handeha handositra ilay mpitsabo miaramila. Kanjo nirefotra ny basy ary niantefa teny aminy. Mbola nahavita nandeha hatreny am-bavahady anefa izy vao nitolefika sy nianjera ary namoy ny ainy. Araka ny filazan’ny manodidina ihany dia tsy nisaron-tava ireto jiolahy ireto. Ny voalazan’ny vadin’ity miaramila manamboninahitra mpitsabo ity kosa no nahafantarana fa vola mitentina 4 tapitrisa ariary sy finday ary solosaina no lasan’ireo olon-dratsy.
Marihina fa mialoha ny nanafihana ny tranon’ity manamboninahitra dokotera ity dia nanafika tokatrano iray hafa teny Nanisana ihany koa ireto jiolahy ireto. Tranona mpikambana ao amin’ny Kongresin’ny tetezamita no notafihin’izy ireo. Tsy tao amin’ity trano ity kosa ilay parlemantera sy ny fianankaviany fa mpiambina sy mpanofa trano no tao. Volamena sy vola ary finday nolasan’izy ireo nandritra izany fanafihana izany. Tsy nisy kosa ny maty na ny naratra tamin’izany. Nilaza ihany koa ireo mpanafika fa diso lasibatra izy ireo, araka ny filazan’ilay mpiambina.
Mitaky vola be ny jiolahy
Fanintelony izany izao, tao anatin’ny andro vitsivitsy, no fantatra fa nisy fanafihana tranona manamboninahitra teto an-drenivohitra. Ny zoma 25 janoary lasa teo, ohatra, dia lasibatry ny herisetra amin’ny andro antoandro be nanahary teny Ambatomaro ny “Controleur general de la Police”, Ranaivoson Dieu Donné. Vao tamin’ny asabotsy 09 janoary teo koa no nisy nanafika ny fonenan’ny « contrôleur général de police », Richard Blaise Randimbisoa, sady talen’ny Sekolim-pirenena ho an’ny « inspecteurs » sy « agents de police », teny Alasora, tokony ho tamin’ny 1ora maraina.Tamin’io asabotsy io ihany, saingy teny Ambatomaro, dia lasibatry ny asan-jiolahy ihany koa ny tranon’ny jeneraly efa misotro ronono, S. Giva Kamaly, izay 65 taona. Marihina moa fa nanao fanamina miaramila avokoa ireo mpanafika ary mitam-basy.

Ny sehon-javatra toy izay dia miteraka ahiahy sy fanontaniana eo anivon’ny fiaraha-monina. Tsy misy mihitsy ve izany ny antoka fa misy mpitandro ny filaminana miaro anao ? Na dia ny “officiers” aza mantsy izao dia lasa lasibatry ny mpanao ratsy. Matetika moa dia ny tokatranon’ny mpanambola no kendren’ny jiolahy ary ankavitsina no andrenesana fa tsy nahazo na inona na inona tao amin’izay fonenana nokendreny, ireo jiolahy. Midika ve izany fa taratra ety ivelany ny mety ho fananan-karenan’ireo “officiers” ireo matoa izireo lasa lasibatry ny jiolahy ? Tsiahivina moa fa anisan’ny sokajin’olona nahazo tombony be indrindra nandritra ity tetezamita ity ny miaramila sy ny mpitandro ny filaminana amin’ny ankapobeny. Ho aiza ity firenena ity ?