Tsy nanaiky ny hampodiana azy Rajoelina

15/02/2013

Narary mafy nanomboka ny 12 febroary lasa teo Rtoa RAZAIARIVELO Helmine, renin’i Lalao Ravalomanana.Fantatra fa aretina vokatry ny alahelo (aretim-po sy tosi-dra) no mahazo azy.Tafakatra hatramin’ny 23 ny tosi-dràny ary dia tsy maintsy naiditra hopitaly izy ny andron’io ihany. Araka ny fitantaran’i Hanitra, zanany vavy dia alahelo an-janany vavy lasa sesin-tany atsy Afrika Atsimo no tena anton’izany. Tsy nanaiky ny hamelana an’i Lalao Ravalomanana hody eto Madagasikara kosa hy filohan’ny tetezamita raha nangatahana manokana ny amin’izany. Tonga namangy ny renin’i Lalao Ravalomanana tetsy amin’ny clinique Ankadifotsy, hopitaly misy azy ny solontenan’ny Ankolafy Ravalomanana omaly atoandro, nahitana ny Praiministra Lefitra Botozaza Pierrot, ny Minisitry ny Varotra Olga Ramalason ary Me Hanitra Razafimanantsoa Filoha Lefitry ny CST.

Nitondra solon-dranom-boankazo izy ireo ary dia tamin-kafaliana tokoa no nandraisan’ny fianakaviana izany na dia ao anatin’ny aretina aza.
Araka ny nambaran’ny Praiminisitra Lefitra Botozaza dia efa nanao ezaka ny ministry ny Ankolafy Ravalomanana ao anatin’ny governemanta, omaly, nanao ny fifampiraharahana mba hampodiana haingana an’i Lalao Ravalomanana hitsabo sy hitsidika ny reniny, isan’ny fanafody mety afaka hanasitrana azy manko izany : « efa nanaiky izany ny praiministra lehiben’ny governemanta, efa nanaiky ihany koa ny ministry ny foloalindahy sy ny ministry ny fitanterana » saingy nilaza ihany kosa ireto farany fa tokony hierana ihany koa i Andry Rajoelina. Niantso azy noho izany ny filohan’ny Kongresin’ny Tetezamita Mamy Rakotoarivelo ary dia nilaza Rajoelina fa « mbola eritreretina lalina ny momba izany ».Mbola nangataka fihaonana taminy ihany ny Ministra Olga Ramalason kanefa dia tsy noraisiny tamin’ny fotoana nomeny hihaonana,fantatra fa nanda mafy hatramin’ny farany ny tsy hampody azy mihitsy Rajoelina.
Tsy resaka politika arak’izany no hodiany eto, eny fa na dia efa voasoratra ao anatin’ny tondrozotra aza fa mahazo mody tsy misy fepetra ny sesi-tany politika rehetra ary isan’izany Lalao Ravalomanana koa dia izao anaovan-dRajoelina be marenina tsotra izao. Voaporofo fa tsy vonona ho amin’ny fitoniana velively i Rajoelina amin’ity toe-draharaha ity satria dia fihetsika tsy mandala fihavanana izao ataony izao. Marihina fa tamin’ny famangiana azy io atoandro io dia tsy nahaloa-peo ny renin’i Lalao Ravalomanana noho ny aretina mafy mahazo azy.