Loza mitatao ho an’ny tontolo iainana

15/02/2013

Fofona maimbo sady tsy laitra iainana no heno teny amin’ny Pont FITIM, toerana izay mbola ato anatin’ny kaomina Mahajanga I sady manamorona ny lalam-pirenena faha-4 tamin’ny fiandohan’ny herinandro lasa teo, fofona izay nahavelon-taraina ny mpandalo rehetra. Ny zoma lasa teo ihany koa dia velon-taraina ireo mponina teny amin’ny manodidina ny tobim-panariam-pakon’ny kaomina eny Antanimasaja vokatry ny fofona maimbo sy tsy laitra iainana teny an-toerana. Samy vokatry karakasin-drakaka izay arian’ireo orinasa mpanjono sy mpanondrana drakaka eto Mahajanga ireo fofona ireo. Fantatra fa fako avy amin’ny orinasa ireo fako mitera-pofona ka manimba ny tontolo iainana ireo saingy tsy mbola fantatra kosa hoe iza amin’izy ireo no nahavita ny nanary ny fakony amin’ny toerana tsy tokony hanaovana izany. Manoloana ireo tranga ireo dia manaitra ireo tompon’andraikitra isan-tsokajiny ny GOSOC Komanga (Groupement des Organisations des Société Civils) izay ivondronan’ireo ONG, fikambanana, Vondron’olona Ifotony miaro ny tontolo iainana eto Mahajanga ny mba hijerena sy hanaraha maso akaiky ireo orinasa manana fako mety hanimba ny tontolo iainana, hijerena ny toerana fanarian’izy ireo ny fakony sy ny hampiharana ny lalàna amin’ireo mpadika izany.

Raha ity fofona maimbo maimbo ity ihany no resahina eto Mahajanga dia voakasik’izany sy velo-taraina matetika ny mponina eny amin’ny Village touristique fokontany Mangarivotra. Misy tokoa mantsy ny rano miangona manakaiky ireo toeram-pandraisam-bahiny eny amin’iny faritra iny sy ny Logistique pétroliere. Rano miangona voafefin’ireo fasika mivangongo vokatry ny « rivo-doza Gafilo » tamin’ny taona 2004 ka tsy afaka mivoaka. Eo anefa araky ny fanadihadina natao no ivarinan’ireo rano maloto sy ranon’orana entin’ny lakan-drano avy any amin’ny fokontany manodidina, ary indrindra indrindra ivarinan’ny rano maloto avy ampiasain’ny orinasa Logistique Pétrolière Mahajanga. Ny zava-doza anefa dia ahitana ireo singa simika sy loto isan-karazany izany ka sady manopy maintso sy mainty no namoaka fofona maimbo mila hanepotra, izay miha-mafy mialohan’ny fahatongavan’ny sambo mpamatsy solika araky ny voalazan’ny mponina manodidina, satria izay no fotoana hanadiovana ireo sinibe fasian-tsolikaao @ ity orinasa ity.
Manoloana ny olana, dia nijery akaiky sy nitaky fanadrisan’andraikitra ny Sampandraharaha misahana ny tontolo iainana, ka nohezahan’ny orin’asa nohalefahana t@ hypoclorite de calcium (Ca(CIO)2 sy Chaux vive CaO ilay ny fofona maimbo t@ faraparan’ny volana janoary lasa teo.
Afaka ny fofona tamin’io fotoana io fa ny rano miangona aloha mbola mitoetra hatramin’izao ka mapanotany tena raha mbola eo ireo singa simika manimba ny tontolo iainana sy ny fahasalama-bahoaka manodidina. Hatraiza ny fiatrekan’izany @ ranomasina sy ny hazan-drano sakafon’ny vahoaka? Tsy adino ny fandraharahana @ fizahan-tany sy @ maha toerana fitsangatsanganana an’i Village touristique?
Raha nanotaniana “vahaolana maharitra” ny tompon’andraikitra misahana ny tontolo iainana eto Boeny dia namaly tamin’ny mpanao gazetin’ny téleviziona tsy miankina iray eto Mahajanga tamin’ny faramparan’ny volana janoary teo fa nampanatena ny hanova ny fantsona fanarian-drano avy amin’ireo sinibe misy ireo loto ariana « décanteurs » ny Logistique Pétrolière Mahajanga, ka havarina avy hatrany any an-dranomasina no tanjona mba hialana amin’ny rano miandrona.
Mametra-panotaniana ary ny GOSOC Komanga: aiza hoa aiza ny fanaraha-maso akaiky sy ny fanadihadihana mialoha iandraketan’ny ONE @ fiantrikan’izao tetikasa kasaina hatao izao amin’ny tontolo iainana (Etude d’Impact Environnemental), indrindra ny amin’ny fahafahany mitahiry solIka mihoatra ny 25 000m3; rahoviana no ho vita ny fanavaozana ny foto-drafitr’asa kasaina hatao; efa misy ve ny fifanomezan-tànana eo @ ireo tompon’andraikim-panjakana samihafa toy ny amin’ny kaominina Andrenivohitra, ny sampan-draharahan’ny fanajariana ny tany sy ny tanàna, ny fizahan-tany, ny jono, ny fahasalamam-bahoaka sy ny tontolo iainana itandroana ny tombotsoan’ny daholo be sy ny ikajiana ny harena voajanahary andranomasina izay anisan’ny havokavoky ny toekaren’ny faritry BOENY?