“Tompon’andraikitra amin’izay mety hiseho ny fanjakana”

16/02/2013

Nandritra ny resaka ho an’ny mpanao gazety izay nokarakarain’izy ireo teny Tsimbazaza no nanambaran’ireo ray aman-drenin’ireo mpianatra Malagasy miisa 856 mianatra any ivelany ny tsy fankatoavan’izy ireo ny fanampahan-kevitry ny fitondrana tetezamita manoloana ny olana atrehan’ireo mpianatra ireo amin’izao fotoana izao. Nisy ihany koa ny antso nataon’izy ireo mba hijeren’ny fitondram-panjakana vahaolana hafa izay eken’ny rehetra manoloana ity raharaha ity

“Tara loatra ny fanomezana ilay vatsim-pianarana roa volana nampanantenain’ny fitondrana tetezamita. Maro amin’ireo zanakay any am-pandratoana fianarana any ivelany any no marary amin’izao fotoana izao noho ny tsy fahampian-tsakafo. Tompon’andrikitra tanteraka ny fanjakana raha sanatria ka misy mamoy ny ainy noho izany ny zanakay”. Ireo no antson’ireo Ray amandrenin’ny mpianatra mandranto fianarana any ivelany nandritra ny tafa ho an’ny mpanao gazety izay nokarakarain’izy ireo teny Tsimbazaza. Niantso ny filohan’ny tetezamita arak’izany izy ireo mba hijery manokana ireo mpianatra ireo. Ankoatr’izay dia tsy manaiky ny hisian’ny fandroahana amin’ny sasany amin’izy ireo mpianatra any ivelany ireo Ray amandreny. Tsy eken’izy ireo ihany koa ny famerenena an-tanindrazana ny ampahany amin’izy ireo araka ny sosokevitra naroson’ny filohan’ny tetezmita. Araka ny fanazavan’ny iray tamin’izy ireo dia tsy aferan’izy ireo ny resaka gaboraraka tamin’ny nandefasana ireo mpianatra ireo any ivelany any, fa ny vahaolana ho an’ny mpianatra no mahamaika anay izao.
Marihina fa araka ny fanazavan’izy ireo dia nandalo sivana avokoa ny fandraisana ireo mpianatra nalefa any ivelany ireo talohan’ny nandefasana azy ireo. Nambaran’izy ireo ihany koa fa nahazo tapak’ila ara-dàlana avy amin’ny ministeran’ny Vola izy ireo tamin’ny nialany teo Madagasikara. Ankoatr’izay dia voalaza ihany koa fa isan’ny nanampy azy ireo tamin’ny fikarakarana rehetra ny fikambanana fitia izay tarihan’ny vadin’ny Filohan’ny tetezamita. Mbola manampy izany ny nazoan’izy ireo vatsim-pianarana nandritra ny efa-bolana tamin’ny taona 2011. Mahagaga anefa, hoy ny fanazavan’izy ireo fa milaza ho tsy mahafantatra an’ity raharaha ity ny filohan’ny tetezamita sy ny governemanta.

Tsar any mampatsiahy fa araka ny fanapahan-kevitry ny Filankevitry ny ministra natao teny Iavoloha ny alakamisy teo dia hampidiana an-tanindrazana ireo mpianatra mamerin-taona (redoublant sy triplant). Mianto-tena kosa izay mbola te-hijanona hanohy ny fianarany. Fantatra ihany koa fa homena tombon-dahany ireo nahazo naoty ambony. Vatsim-pianarana roa volana no baiko neken’ny filohan’ny tetezamita homena azy ireo.