Mitaky fanajàna ny fitsarana Malagasy

16/02/2013

Nitondra ny heviny manoloana ny fanambarana nataon’ny Filankevim-pilaminan’ny Vondrona Afrikana ny mpikambana ao amin’ny Vaomieran’ny Raharahambahiny ao anivon’ny Kongresin’ny tetezamita. Fitakiana ny fanajana ny fitsarana eto Madagasikara sy ny fanajana ny fiandrianam-pirenena no votoatin’izany fanambarana izany.

Tsy nandalo fotsiny tamin’ny sofin’ireo mpanao politika eto amintsika ny fanambarana navoakan’ny Filankevim-pilaminan’ny Vondrona Afrikana (CPS) izay mitaky ny hampiharana manontolo ny tondrozotra, indrindra ny fampodiana an-tanindrazana ny sesitany politika ka isan’izany ny filoha teo aloha Ravalomanana Marc. Tsiahivina fa araka ny nambaran’ny CPS dia miankina amin’ny fanananterahana an’izay fepetra izay no hamahana ny sazin’i Madagasikara. Ho an’ny mpikambana ao amin’ny Kongresin’ny Tetezamita Razafimahaleo Mamy dia tsy azo ekena izany fanambaran’ny CPS izany. “Firenena manana ny fiandrianany I Madagasikara hoy izy, ary tokony hajaina ny raim-pitsarana ao aminy”. Nambarany ihany koa fa tsy mitovy amin’ny fihetsiky ny CPS any amin’ny firenen-kafa aty amin’ny Kontinanta Afrikana ny fihetsiny manoloana ny raharaha eto Madagasikara. Nitaky ny hanova’'ny CPS izany fihetsika izany ity parlemantera ity.
Voaaja ny fitsarana
Tsara ny manamarika fa tsy vitsy ny nahita fa tsy fanitsakitsahana ny hasin’ny fitsarana eto Madagasikara sy ny fiandrianam-pirenena velively iny fanambarana nataon’ny CPS iny. Satria tsy ny CPS fa ny ankolafin-kery eto Madagasikara izay nanao Sonia ny tondrozotra no nanao ny fifanarahana izay milaza fa tsy maintsy hampodiana an-tanindrazana tsy misy fepetra ny filoha teo aloha Ravalomanana Marc. Marihina fa tsy nisy noterena ireo mpanao Sonia ny tondrozotra. Faharoa manarak’izany dia efa lasa làlana izany tondrozotra izany taorian’ny nandaniana azy teny anivon’ny Parlemanta roa amin’izao tetezamita izao. Koa raha milaza ny CPS fa tokony hampiharina an-tsakany sy an-davany ny tondrozotra dia midika izany fa manosika ny Malagasy hanaja ny làlana misy ao aminy ity rafitry ny Vondrona Afrikanina ity.