Ny laojikan’ny MAGRO ?

19/02/2013

Mampametra-panontaniana ny maro ny laojikan’ny MAGRO manoloana ny raharaham-pirenena. Niharan’ny fanenjehana avy amin’ny filoha teo aloha, Marc Ravalomanana ary ireo vahoakan’ny MAGRO ireo mpanao politika toa ny filohan’ny Kongresin’ny Tetezamita teo aloha, Raharinaivo Andrianantoandro, ny ministra teo aloha Yves Aimé sy Hery Raharisaina, Ratefinanahary Emile na Vazaha, satria nanaiky niditra ho isan’ny mambra ny governemanta sy ny andrim-panjakana Tetezamita. Nosokajian’ny MAGRO sy ny vondrona Ravalomanana ho mpamadika mihitsy aza izy ireo noho izay fanapahan-kevitra izay. Fikaroham-bahaolana hivoahana amin’izao krizy izao no antony naneken’izy ireo izany andraikitra izany raha ny fanazavana azo avy tamin’ny GMMR. Niharan’ny fanenjehan’ny fitondrana HAT avokoa ireto mpanao politika ireto; tao ireo namoahana didy fisamborana, ny hafa kosa notànana am-ponja ary samy mbola manan-draharaha eny amin’ny tribonaly noho ny fiarovana ny foto-kevitra tsy nitoviana tamin’ny HAT. Nihazakazaka ny toe-draharaha ka tsy nijanona fotsiny teo amin’ny resaka tsangan’olona fa ntodika bebe kokoa tany amin’ny fiainam-pirenena.

Ny fivoahana amin’ny krizy mampitsoka lalina ny tanindrazana iombonana izao no laharam-pahamehana ho an’ny rehetra ka nahatonga ireny fifanarahana teo amin’ny mpitondra fanjakana HAT ary ireto mpanao politika avy amin’ny TIM ireto. Ankehitriny, niditra ho mambra ao amin’ny governemanta sy ny andrim-panjakana Tetezamita ihany ireo izay nitonona ho tsy mankasitraka ny fanapahan-kevitra efa noraisin’ireo mpanao politika avy amin’ny TIM nosokajian’ny MAGRO ho mpamadika.
Ankehitriny, ny lietna kolonely Charles Andrianasoavina izay nitàna andraikitra goavana (araka ny filazany), nandrodana ny filoha teo aloha teo amin’ny fitondrana, nanenjika sy nampahory ireo mpanao politika “mpomba an’i dada” indray no lasa maherifon’ny MAGRO. Izay laojikan’ireo mpomba ny filoha teo aloha etsy Behoririka izay mihitsy no mampametra-panontaniana ny mpanara-baovao. Manontany tena eo anatrehan’ny zava-misy ny GMMR: “ny olona izay “namono” ny tena tahaka ny kolonely Charles indray ve no hitehafan’ny MAGRO amin’izao fotoana; fanenjehana kosa ho anay izay nanao sorona ny ainay niatrika ireo karazana fisamborana nandritra ireny fotoana mahavaivay teto amin’ny firenena ireny? Fivoahana amin’ny krizy no noheverina fa laharam-pahamehan’ny rehetra; koa inona no fahadisoan’ny GMMR teo anatrehan’ny fandraisana andraikitra izay nataony ho amin’izany famahana ny krizy izany?”.
Tsy mbola manana kandidà hotohanana ny GMMR, araka ny nambaran’ireo tomponandraikitra avy amin’ity antoko politika ity. Manana programam-piarahamonina azy manokana ny antoko ka tsy tsangan’olona velively no handraisany fanapahan-kevitra. Tsy mbola nisy nandroso izany programam-piarahamonina izany anefa ireo kandidà efa nitonona fa handray anjara amin’ny fifidianana filoham-pirenena. Tsy misy misakana ny GMMR tsy handrotsaka olona ho amin’izany hazakazaka masina izany koa anefa, amin’ny maha antoko politika manana ny programam-piarahamonina azy. Amin’ny maha minisitra teo aloha tao anatin’ny governemanta Camille Vital fotsiny ihany no namalian’izy ireo ny antson’ity lehiben’i Mahazoarivo teo aloha ity fa tsy midika ho fanohanana ny firotsahan-kofidiany velively.