Olona 4 no maty, 2146 no traboina

19/02/2013

Namela takaitra tamin’ny faritra maro manerana ny Nosy ilay andro ratsy misy eto amintsika hatramin’ny faran’ny herinandro teo ka hatramin’izao. Nahatratra efatra ny olona maty vokatr’izany andro ratsy izany, araka ny tatitra avy amin’ny BNGRC (Bureau national du gestion des risqué et des catastrophes), omaly tamin’ny dimy ora hariva. Mahatratra 2146 kosa ny tra-boina, ka ny 500 amin’ireo dia eto Antananarivo renivohitra avokoa. Mbola mitoetra hatrany any amin’ny 400 km atsimo andrefan’i Maintirano, ary mihamafy herin’izany andro ratsy izany, ary mbola hitondra ora-mikija manerana ny Nosy.

Faritra maro teto Madagasikara no nitondra faisana vokatry ny ora-mikija nentin’ilay andro ratsy izay niforona tany amin’ny lakandranon’i Mozambika tamin’ny zoma teo. Araka ny tatitra navoakan’ny BNGRC omaly tamin’ny dimy ora tolak’andro dia miisa 4 ny maty vokatr’izany andro ratsy izany ka ny telo tamin’ireo dia tany amin’ny distrikan’i Maintirano. Ny iray kosa dia tany amin’ny distrikan’i Mampikony. Mahatratra 2146 kosa ireo traboina sy tsy manan-kialofana vokatr’izany. Avy amina fianankaviana 287 ireo traboina ireo. Ny 500 amin’izany traboina izany dia avy eto Antananarivo renivohitra avokoa. Avy any amin’ny distrikan’ny Miandrivazo kosa ny 1546 ary avy any Ifanadiana ny 100. Mbola ny tatitry ny BNGRC ihany koa no nahafantarana fa mahatratra 749 ny trano rava vokatr’izany andro ratsy izany manerana ny Nosy. Any amin’ny distrikan’i Miandrivazo ny 424 amin’ireo ary any amin’ny distrikan’Ifanadiana ny 20. Tany amin’ny distrikan’i Manakara kosa ny 40 ary tany Vohipeno ny 250.

Fanampiana

Manoloana ireo fahavoazana ireo dia efa nisy ny fepetra sy ny fanampiana nataon’ny BNGRC. Isan’izany ny fanetsahana ireo sampan-draharaha rehetra ao aminy mba hisian’ny fampifandraisana sy ny fampitam-baovao mitohy any amin’ireo faritra tena niharan’ny fahavoazana. Teo ihany koa ny fitondrana famonjena ho an’ireo mponina traboina. Nomena vary fotsy milanja 2 taonina ny tany Miandrivazo, miampy anana 500 kg sy savony 10 baoritra, tranoeva miisa 5 ary fanafody sy fanadiovan-drano. Nomena fanampiana ihany koa ny traboina teto Antananarivo renivohitra ka vary 600 kg sy savony 5 baoritra, anana 200kg, bodofotsy miisa 51 ary labozia 51 fonosana no natolotra tamin’izany. Ho an’ny faritra Vatovavy Fitovinany kosa dia nandefasana HTH miisa 4 ary mitentina 18000 izy ireo.

Tsara ny manamarika fa mbola ao amin’ny faritry ny lakan-dranon’i Mozambika amin’izao fotoana izao izany andro ratsy izany ary tsy mitsaha-mitombo ny heriny. Nambaran’ny sampandraharaha mpamantatra ny toetrandro fa mbola hitondra ora-mikija saika manerana ny faaritra rehetra eto Madagasikara izany andro ratsy izany. Marihina fa mbola tsy mahafeno ny fepetra manandrify amin’ny rovo-doza akory ity andro ratsy atsy amin’ny lakandranon’i Mozambika ity.