Nalaina Jeneraly sy kolonely ny kianja

19/02/2013

Vaky ny ady eo amin’ny tompon’andrikitra miaraka amin’ny Ray aman-drenin’ny mpianatra ao amin’ny Sekoly fanabeazana Fototra Pointe Tanio, etsy an-daniny, ary Jeneraly iray miaraka amina Kolonely iray avy ao amin’ny RM1/3 any Toamasina, etsy an-kilany. Tondroin’iretsy voalohany ho naka an-keriny ny tannin-tsekoly iretsy farany. Efa nakarina amin’ny tompon’andrikim-panjakana mahefa ny raharaha amin’izao fotoana izao. Fanararaotam-pahefana no ilazan’ny maro ny fihetsika nataon’ireto manamboninahitra jeneraly sy kolonely avy ao amin’ny RM1/3 any Toamasina ireto.

Araka ny loharanom-baovao dia tamin’ny alatsinainy 4 febroary izy no tonga tao amin’ny talen’izany sekoly fanabeazana fototra izany ary nilaza tamin’ny talen-tsekoly fa haka ny taniny izy ireo. Herinandro taorian’izany, izany hoe ny alatsinainy 11 febroary, dia tonga teny an-toerana ireo andiana miaramila miaraka amin’ny basy kalachnikov, sy ireo volotsangana izay nentin’ny fiaraben’ny miaramila ary namefy ilay kianja filalaovam-baolin’ny mpianatra. Voalaza ihany koa fa nangata-pahazavana ny teo anivon’ny fitantanana ny EPP Pointe Tanio kanefa resaka tsy hay valiana no navalin’ilay kolonely miaramila izany. “Tsy mila miresaka sy mifandraharaha aminao izahay, haka ny taninay izahay dia ampy anao izay. Ny anay koa baiko miaramila ka tsy maintsy tanterahina”, hoy ny nambarany, araka ny loharanom-baovao.
Marihina fa nandray fepetra ny ray aman-drenin’ny mpianatra sy ny mpandraharaha tao amin’ity sekoly ity manoloana izao toe-draharaha izao. Nitondra ny raharaha teo anivon’ny Cisco sy ny Dren any amin’ny Faritra Atsinanana izy ireo. Nilaza ny hitondra ny raharaha eo anivon’ny fanjakana mahefa kosa ireto farany ary nilaza ihany koa fa eo am-pangatahana didim-pitsarana handravana ny fefy sy hamerenana ny tany amin’ny sekoly.
Tsar any mampatsiahy fa tamin’ny andron’ny Repoblika voalohany, izany hoe ny taona 1958 no efa nitsangana teo amin’ity toerana ity io sekoly io, izay isan’ny sekoly voalohany tao Toamasina. Roa taona taorian’izany kosa, izany hoe ny taona 1960 vao nisy izany tafika Malagasy, izay milaza ho tompon’ny tany ankehitriny. Miisa 510 ny mpianatra ao amin’ny Epp Pointe Tanio amin’izao fotoana izao. Manomboka amin’ny kilasy CP1 ka hatramin’ny CM2 ireo mpianatra ireo. Ankoatr’ireo mpianatra ao aminy dia mampiantrano ireo mpianatra sasany avy amin’ny CEG Augagneur ihany koa ny sekolyanefa ny sekoly noho ny tsy fahampian’ny efitrano fianaran’izy ireo amin’ny Bd Augagneur.