Tsy ampy teti-bola hiasana

19/02/2013

Ny fanambarana nataon’ny lehiben’ny fampanohavana any Toamasina nandritra ny fanokafana ny taom-pitsarana 2013 no nahafantarana fa manahy ny amin’ny fanatanterahana ny asan’izy ireo amin’ity taona ity ireo mpitsara any an-toerana. Araka ny nambaran’i Andriamahangy Georges Florence dia “sahirana ara-teti-bola entina miasa ny fitsarana Malagasy amin’ity taona 2013 ity”. “Ho sahirana izahay amin’ity taona ity, hanomana ny fitsarana ny ady heloka be vava tsotra, izay tsy maintsy hanaovana fitsarana manokana, na efa nanomanana fotoam-pitsarana ady heloka be vava tsotra maromaro izahay, dia tsy ho vita izany satria tsy misy vola hanaramana ireo mpitsara mpanampy sy ireo vadintany”, hoy ny fanazavany. Nomarihan’ity lehiben’ny fampanovana ambony ao Toamasina ity ihany fa “efa nanahirana izy ireo tato ho ato izay ny tsy fahaloavan’ny fitsarana ny vola fanome ireo vadintany mpiara-miasa aminay, efa nomanina ho haloa amin’ity taona ity izany nefa izao tratry ny olana ara-teti-bola izao indray”.

Na izany na tsy izany dia nanome toky ireo mpitsaran fa hanao ezaka izahay satria tsy ho vita ny asam-pitsarana raha tsy misy azy ireo amin’ny fiantsoana ny mpanan-draharaha sy ireo olona tokony hiakatra fitsarana ary ny fampiharana ireo didim-pitsaran’ny mpitsara. Ankoatra izay, nambaran’Atoa Andriamanhangy Georges Florence fa “tsy lavina raha laharana faha-03 amin’ny fitarainana voarain’ny Bianco ny fitsarana, maro ny anton’izany ary efa ezahanay arenina ; eo ny tsy fahalalan’ny olona ny raharaham-pitsarana indrindra ny raharaha sivily, ady tany – ady lova – fitakiana trosa…izay tena olana goavana ho an’ny mpanan-draharaha”. “Ny tena olana koa ireo mpisandoka mpaka vola aman’olona izay manimba ny mpitsara tsy mahalala akory ny raharaha. efa eo am-pitiliana ireny olona ireny izahay, ary raha misy ny tratranay dia tsy maintsy aparitakay ho fantatry ny vahoaka ireo olona mpisandoka ireo”, hoy Atoa Andriamahangy Georges namarana ny fanazavany.