Namaly ny fanakianana azy ny “Mainland”

20/02/2013

Mbola misy foana mandrak’izao ny fanakianana ny orin’asa Mainland izay miandraikitra ny fanarenana ny lalam-pirenena faha-5 araka ny fifanarahana teo aminy sy ny fitondrana tetezamita. Isan’ny kiana mahazo ity orinasa ity amin’izao fotoana izao ny fahataran’ny fanatanterahana ny asa. Ireo mpitondra eny an’ivon’ny faritra no tena manao izany fanankianana izany, toy ny lehiben’ny Faritra Analanjirofo Saina Michel. “Izao mihintsy no hitondra soram-baventy sy hitarika olona hirotsakaa an-dalambe raha tsy vita ny RN5. Aiza ka mbola 800m no hany vita. Efa lanin’ny MainLand ve ny mamy sy ny harenan’ny Malagasy, nosimbainy ny RN5, nahazo tombony tamin’ny fitrandrahana ny fasimainty ihany koa;

dia tsy hiasa saina amin’ny fanamboarana ny simba izy?...tsy azo ekena izany”, hoy ny lehiben’ny Faritra Saina Michel nilaza ny hatezerany manoloana ny zava-miseho. Ireo mpanara-baovao kosa dia mahita fa misy ambadika ity raharaha ity. Araka ny hitan’ny maro dia ny ady tombontsoa ataon’ireo mpitondra isan’ambaratonga no tena anton’izany fanakianana mirarak’ompana izany.
Mazava rahateo ny nambaran’ny tompon’andrikitra iray avy ao amin’ny orinasa Mainland manoloana ny fahataran’ny fanatanterahana ny asa fanarenana ny lalam-pirenena faha-5. “Mihaiky ny fahataran’ny fahavitan’ny asa izahay MainLand, izay no nahatonga anay nandray ny andraikitray voalazan’ny bokinandraikitra nifanekenay tamin’ny fanjakana Malagasy amin’ny fanamboarana ny lalam-pirenena faha-05 izay nampiasainay, ka nahitana fahasimbana”, hoy ny tompon’andraikitra voalohany ao amin’ny orinasa MainLand misahana ny fanarenana ny RN5. Nambarany ihany koa fa “tsy izahay no nisafidy hoe fanarenana no atao, fa ny fanjakana tamin’ny alalan’ny minisiteran’ny Asa vaventy, ka izay ny asa ataonay miaraka amin’ny mpiara-miasa aminay ankehitriny izay tsy maintsy vitainay satria efa nekenay ary nanokananay vola nanomboka ny taona 2007 niasanay voalohany tao Analanjorofo”.
Marihina fa tao anatin’ny iray volana, izany hoe teo anelanelan’ny 19 janoary ka hatramin’ny 19 febroary 2013, dia 18% ny lalana mirefy 55km no vita. Nambaran’ny teknisianin’ny MainLand fa “misy teknika ny fanamboarana ny RN5 araka ny fepetra napetraky ny fanjakana. Manampy trotraka ihany koa ny andro ratsy tato ho ato izay nampitarazoka ny asa ary ny fandrindrana ny fampiasan’ny olona ny lalana sy ny fanamboarana tsy maintsy atao”. Ankoatra izay, dia efa nandoha ampahany voalohany amin’ny vola 150 tapitrisa ariary tamin’ny minisiteran’ny Asa vaventy (09% ny vola navoaka) ho fanaraha-maso ny asa ny MainLand, araka ny fifanarahana teo amin’ny roa tonta ny 18 janoary. Mpiasa 100 ka ny 12 teknisiana sy mpandraharaha no misahana ny asa, manodidina ny Ar.1.700 tapitrisa ny teti-bola, ary ho vitaina ao anatin’ny efa-bolana ny asa fanarenana ny lalana 55km ka 12% no tena simba, izay mampitohy an’i Toamasina sy Mahavelona Foulpointe.