Tezitra amin’ny fitondrana Tetezamita

25/10/2012

Manome fe-potoana hatramin’ny faha 5 novambra izao ho an’ny fitondrana tetezamita ny zanak’i Toamasina mba handraisany andraikitra manoloana ireo fitakiana maro sosona izay ataon’izy ireo. Fitakiana izay manandrify ireo heverin’izy ireo fa tsy rariny sy fanararaotana mahazo ny mponina any amin’iny faritra iny. Efa nanao hetsika goavana izy ireo nanomboka tamin’ny alatsinainy teo ary mbola hitohy izany, araka ny nambaran’i Rakotomalala Henri na i Riribe izay nitarika ny valan-dresaka ho an’ny mpanao gazety teto Antananarivo omaly. Raha dila io fe-potoana io dia hitaky

ny fanesorana ny lehiben’ny faritra sy ny fanakatonana ny tetik’asa Ambatovy izy ireo.Vaky ny ady eo amin’ny zanak’i Toamasina izay mivondrona ao amin’ilay fikambanana fantatra amin’ny hoe « Tsisy miala eto niany » sy ireo rehetra heverin’izy ireo fa mamoritra ny vahoaka sy manararaotra ny vahoaka sy ny haren’iny faritra Antsinanana iny. Nitondra fanazavana mikasika ny zava-misy any amin’izany faritra izany, omaly, ny filohan’ny hetsika « Tsisy miala eto niany », izay nanao valan-dresaka ho an’ny mpanao gazety tao amin’ny hôtely Mon gouter etsy Andrefan’Ambohijanahary. Iray amin’ireo fitakian’izy ireo ny momba ny zon’ireo olona very tany tao amin’ny faritry ny seranam-piaramanidina any an-toerana. Araka ny fanambaran’izy ireo dia misy fanankaviana very tany tao amin’izany teoarana izany, vokatry ny fibodoana ny tanin’izy ireo. Mitaky ny fanonerana ny volan’ireo olona nesorina tamin’ny taniny vokatry ny fametrahana ny fantsona mitondra ireo vokatra avy amin’ny fitrandrahana ataon’ny Tetik’asa Ambatovy ihany koa izy ireo. Araka ny fanazavana dia manodidina ny 2 ka hatramin’ny 4 tapitrisa Iraimbilanja no tamby nomena ireo olona tompon’ireny tany ireny. Vola izay kely dia kely raha oharina amin’ny tombontsoa azon’ny tetik’asa. Mitaky ny zon’ireo mpiasa taloha tao amin’ny tetik’asa Ambatovy ihany koa ireto mpanao fihetsiketsehana avy any Toamasina ireto. Tokony hahazo vola 30 tapitrisa iraimbilanja isan’olona ireo very asa tamin’izany orinasa izany, araka ny hevitr’izy ireo.
Ankoatr’ireo dia nampatsiahy ihany koa ry Riry be sy ny namany fa nisy ny fitoriana napetrak’i Mandraina Felix. Ity farany izay mitory ny MICTSL any Toamasina kanefa tsy nisy tohiny izany fitoriana izany hatramin’izao. Niafara tamin’ny fanesorana an’i Mandraina Felix teo amin’ny maha filohan’ny Comité ad hoc an’ny Antenimieran’ny Varotra sy ny Indostria mihintsy ity raharaha ity araka ny nambaran’ireo mpandaha-teny teny amin’ny Mon Gouter omaly. Nambaran’izy ireo ihany koa fa mahakasika ireo olona akaiky ny filohan’ny tetezamita ity raharaha itoriana ny MICTSL ity ka izany no nahatonga ny tsy firaharahana ny fitoriana nataon’izy ireo.
Isan’ny fitakian’ireto zanak’i Toamasina ireto ihany koa ny hananganana “cellule de crise” hanao fanadihadiana lalina mikasika ny trafika avo lenta izay misy amin’ny sehatra rehetra amin’izao fotoana izao. Nambaran’izy ireo fa mitondra faisana noho izany iny faritra misy azy ireo iny sy ny firenena iray manontolo koa angatahin’izy ireo ny hisian’izany fanadihadiana izany.
Marihina fa nanome fe-potoana mandram-pahatongan’ny 5 novambra ahafahan’ny fitondram-panjakana mandray andraikitra manoloana ireo fitakiana nataony ireo ny zanak’i Toamasina. Nambaran’izy ireo far aha dila io fepotoana io ka tsy misy ny fandraisan’andraikitra avy amin’ny mpitondra dia hitaky ny fanesorana ny lehiben’ny faritra Antsinanana sy ny fanakatonana ny Tetik’asa Ambatovy izy ireo. Mandram-piandry izany anefa dia hanohy ny hetsika an-dalambe any Toamasina toy izay efa nataon’izy ireo hatramin’ny Alatsinainy lasa teo ireto zanak’i Toamasina ireto. Hetsika izay nitety ireo faritra maro tao an-tampon-tanan’i Toamasina.