Tany atsimo ny Jeneraly Ravalomanana

22/02/2013

Ho fanamafisana ny ady amin’ny tsy fandriampahalemana any amin’ny faritra atsimon’ny Nosy, dia nidina nijery ifotony tany an-toerana ny jeneraly Randrianazary, sekreteram-panjakana miadidy ny Zandarimariam-pirenena sy ny Jeneraly Richard Ravalomanana, komandin’ny Zandarimariam-pirenena ny alahady 17 febroary 2013 ka namory ireo tompon’andraikitry ny mpitandron’ny Filaminana rehetra (EMMO/REG) ao an-toerana niaraka tamin’ny lehiben’ny Faritra. Tamin’izany no nanamafisan’izy ireo ny tokony hanatsarana ny fampandriana fahalemana (MO) an-tanandehibe sy am-banivohitra (sécurisation), ny tsy tokony ifampiharovana amin’ny ratsy (corporatisme) fa hanamafisana ny firaisan-kina, ary ny asa rehetra dia tanterahina ao anatin’ny lalàna velona (rester dans le cadre de la loi) fa tsisy idiran’ny resaka politika izany.

Ny alatsinainy 18 febroary kosa no nandeha tany Amboasary Atsimo ny Jeneraly Ravalomanana, komandin’ny Zandarmariam-pirenena, ka namory ireo benin’ny tanàna rehetra sy tompon’andraikim-panjakana ao an-toerana mba hijerena ifotony ny asan-jiolahy mba hamerenana ny fahatokisan-tenan’ireo manampahefana ireo ka nanamafisana fa tsisy odim-basy sy ny fitaovam-piadiana avolenta (armement sophistiqué) ampiasan’ireo dahalo fa basy kalachnikov vitsy no eo am-pelantanan’izy ireo. Nohatsaraina ihany koa ny fiaraha-miasan’izy ireo amin’ny tokony handefasana ny tatitra tsy fandriampahalemana mivantana any an-toerana mba handraisan’ny tompon’andraikitry ny filaminana andraikitra mivantana ka nanazavàna ny « coup d’arrêt », ny « appropriation de la mission », ny fanatsaràna ny « auto-défense villageoise ».
Nasiana resaka ihany koa ny fanadiovana ireo sehatra mifaningotra amin’ny ady amin’ny tsy fandriampahalemana toy ny Fitsarana, ny famotsiana ireo omby halatra, ny fampiravonana ny fiaraha-monina ka nanamafisan’ny komandin’ny Zandarimariam-pirenena fa efa nilaozan’ny toetrandro ny fampiadiana ny foko eto Madagasikara satria efa afaka mifanerasera sy mifankahazo tsara ny Malagasy hatrany atsimo ka hatrany avaratra, hatrany andrefana ka hatrany atsinanana.

Nankasitraka

Tsapan’ireto tompon’andraikitra ambony ireto tamin’ny fandalovan’izy ireo tany ihany koa fa mankasitraka ny hetsika fampandriana fahalemana natao, atao ary mbola hataon’ny mpitandro ny filaminana any amin’ iny faritra iny ny vahoaka ka nihoby azy izy ireo ary nanameloka am-pahibemaso ireo mpanao pôlitika izay mpanejika ny mpitandro ny filaminana ireo vahoaka ireo. Tsapa fa tena maharary ny vahoaka ny tsy fandriam-pahalemana mitranga amin’iny faritra iny ka tena nanamaivana azy ireo mihitsy izao fandalovan’ireo tompon’andraikitra roa voalohany ao amin’ny Zandarimariam-pirenena ireo izao.
Ho tohin’izany dia nahitam-bokatra tsara sahady, ka ny 21 febroary 2013 tamin’ny 4 ora 30 maraina no nisehoana halatr’omby tao Imanjola, fokontany io ihany, kaominina Tsivory, distrika Amboasary Atsimo izay notafihan’ny dahalo 50 ka nahaverezana omby 100 ary nisy fokonolona iray no maty ary iray no naratra. Nisy tamin’ireo fokonolona no afaka niantso ka nampandre haingana ny kolonely Rakotoarison Anthony, directeur de la sécurité et des renseignements ao amin’ny Toby Ratsimandrava, ka nahafahana nanetsika haingana ireo miaramila (zandary sy tafika) manao opérations sy ny Hélicoptère tao Betroka. Tsy niandry ela ireo fa nihetsika sy nanenjika avy hatrany teo ambany fitarihan’ny Jeneraly Iama Radafy ka tratra teo Analagnaty, kaominina Soanala, distrikan’i Betroka, toerana mampisaraka ny distrikan’i Betroka sy Amboasary atsimo, ireo dahalo tamin’ny 10 ora maraina. Raikitra ny fifandonana ka vokatr’izany dia tafaverina amin’ny tompony avokoa ireo omby 100 very ary dahalo efatra (04) no maty. Hamafisina hatrany ny fanentanana ny rehetra ny amin’ny hampiasana ny laharana maitso 119 sy 305.