Fanavaozana maika ny Tafika

23/02/2013

Nokianin’ny Sehatra fanaraha-maso ny fiainam-pirenena (Sefafi) mafy dia mafy ny mpanao politika Malagasy izay ambaran’izy ireo fa “niamboho ny adidiny” ka tsy nahatafavoakaa an’i Madagasikara tamin’izao krizy ireo. Tamin’ny alalan’ny fandrafetana ho atontan-kevitra iray ireo fanambarana rehetra navoakany nandritra ny taona 2012 no nanambaran’ny Sefafi izany. Ho an’izy ireo dia ny fandraisan’andraikitry ny CENIT amin’ny fanatanterahana fifidianana eken’ny rehetra no hany vahaolana tokana hivoahan’ny firenena amin’ny krizy. Omaly no nanoloran’ny Sefafi an’ity atontan-kevitra vaovao izay novokariny ity.

Napetraky ny Sefafi teo anatrehan’ny feon’ny fieritreretany tanteraka ny mpanao politika eto amintsika, raha naneho ampahibemaso ny atontan-kevitra mirakitra ny fanambarana nataony nandritra ny taona 2012. Nampahafantarin’ny Sefafi ny vahoaka ihany koa, tsetsy an-danin’izany, ny fahitany ny zava-misy amin’izao fotoana izao eto amin’ny firenena. Zava-misy izay nosokajiany ho vokatry ny tsy fahamendrehan’ireo mpanao politika Malagasy. “Niamboho adidy ny mpanao politika”, izay indrindra no teny naverimberin’ny Sefafi tamin’ity tahirn-kevitra ity. Antony maro no nahatonga azy ireo holaza izany.
Voalohany amin’izany dia noho ny tsy fandraisan’andrikitr’ireo izay voatendry handrafitra ireo andrim-panjakan’ny tetezamita (Filankevitra ambonin’ny tetezamita, Kongresin’ny tetezamita, Governamantan’ny firaisam-pirenena) “izay tokony hitantana ny raharaha andavanandro ary nanome lanja ny fampihavanam-pirenena , kanefa nifanendritendry sady tsy nahazo fahefana tamin’ny fomba demokratika ka zary lasa sehatry ny fizarazarana seza sy tetika iarovana ny tombontsoan’ny tena ary samy nanao izay hampatanjaka ny ankolafy izay niandaniany sy hampalemy ny mpifanandrina aminy”. Ankoatr’izany, “niamboho ny adidiny ihany koa ny mpanao politika manoloana ny famotsoran-keloka, ary niray tsikombakomba taminy tamin’ny ireo fiarahamonim-pirenena sasany hita tsara fa tafatsofoky ny politika”, hoy ihany ny Sefafi. Nambaran’ny tatitry ny Sefafi fa maro amin’izy ireo no lasa minisitra na parlemantera na dia efa nomelohin’ny fitsarana teo anatrehan’ny lalàna aza, ary tsy nanaiky ny hanao fanambarana momba ny fananany. Isan’ny nahazo fanakianana mafy tamin’ny Sefafi ihany koa ny fikarakarana ny fifidianana. “Nihisatra be ny fananganana sy famatsiana ny CENIT, misy tetika maizimaizina manodidina ny CRN, ilay Fitsarana manokana momba ny fifidianana mampisalasala”.
Mitaky ny fanavaozana ny Tafika
Ankoatr’izay dia nasian’ny Sefafi resaka ihany koa ny tsy fahombiazan’ny hetsika “tandroka” sy ny firongatry ny halatr’omby any atsimo, ny fitombon’ny fanafihana eny amin’ny lalam-pirenena, ny fandrombana mitampiadiana eny an-tanandehibe. Mitaky ny hanavaozana haingana dia haingana ny Tafika, arak’izany ny Sefafi.
Mbola isan’ny nanakianan’ny Sefafi ny mpanao politika ihany koa ny fanondranana an-tsokosoko ny harem-pirenena sy ny firongatry ny kolikoly eto amintsika. Momba ny andramena, tsy mampino hoy ny Sefafi ny tsy mbola nahalalana sy nitsarana ihany izay tompon’nandrikitra taorinan’ny nahatratrarana raharaha nifandimby nandritra ny taona maro. Tsy misy afa-tsy antony tokana no mampisy ny olona tsy maty manonta. Satria saika mpanao politika avokoa no voarioroy amin’ireny fanondranana antsokosoko ireny.
Manahy mafy ny tsy ahatombombana ny fifidianana arak’izany ny Sefafi. Nambarany fa ahiana mbola hiteraka krizy vaovao indray izany fifidianana izany satria tsy misy na iray aza amin’ireo mety hirotsaka ho fidina no tsy efa niamboho ny adidiny. Mitaky fandraisan’andrikitry ny CENIT arak’izany izy ireo mba hanao izay azony atao amin’ny fikarakarana fifidianana eken’ny rehetra.