Voatifitra teo amin’ny tendany ilay mpitatitra

23/02/2013

Maty teo no ho eo i Isidore, mpanao fitateran’entana amin’ny làlana mampitohy an’i Toamasina sy Fenoarivo Atsinanana. Teo amin’ny tendany no niantefa ny balan’ny basin’ireo jiolahy nitifitra azy. Omaly tokony ho tamin’ny sivy ora maraina no nitrangan’izany tao amin’ny Bazary kely tany Toamasina ary teo anatrehan’ny mpivarotra sy mpiantsena maro dia maro. Araka ny loharanom-baovao avy any an-toerana dia naterin’ny mpamiliny sy ny mpanampy azy tao amin’ny Bazary kely i Isodore ary hisakafo maraina no anton-diany tamin’izany.

Nandritra izany kosa dia nirahiny haka entana teny amin’ny orinasa Star ireo mpiasa niaraka. Teo am-pisakafohanana izy no tonga ireo jiolahy miisa telo hoy ny sasany, efatra kosa hoy ny hafa. Nambanan’ireto farany basy PA i Isidore, araka ny fitantaran’ireo nanatri-maso. Basy PA miisa roa ireo nanambanan’ny jiolahy azy ireo. Ireto farany izay nanery azy hanome azy ireo ny sakosy kely teny an-tendany. Noho ny faneren’ireo jiolahy tamin’izany fanambanana basy izany dia nomeny azy ireo ilay sakaosy. Taorinan’izany dia nitsoaka avy hatrany ireo jiolahy. Niezaka ny nanenjika azy ireo kosa i Isidore, kanjo tifitra basy no navalin’ireo jiolahy izany. Bala “22 long rifles” izay nahavoa ny teo amin’ny tendany izany nanafaingana ny fahafatesany noho ireo lalan-dra lehibe tafiditry ny bala. Marihina fa toerana tokony ho 300 metatra tsy lavitra ny biraon’ny polisy ao Bazarikely no nitrangan’izany vono olona izany.
Araka ny nambaran’ny mpamily ny fiaran’i Isidore dia tsy nisy vola afa-tsy 30 000 ariary tany anatin’ilay sakaosy kely tenay am-bozon’ity lehilehy nisy namono ity. “Lany vola nanamboatra fiara izahay ny alakamisy, ary ny solika nampiasainay hiverenana any Fenerivo atsinanana aza, avansy nalaina tamin’ny tompon’entana no nandohavana azy” hoy ilay mpiasa. Hatreto dia tsy mbola voasambotra ireo jiolahy. Efa nentin’ny havany nody any Fenoarivo Atsinanana kosa ny razana taorian’ny fanadiadiana nataon’ny dokotera “legiste” sy ny kaominina mikasika ny fomba nahafaty azy.