Ho sarotra ny fanarenana

25/02/2013

Loza marososona no nahazo ny faritra atsimon’ny Nosy. Ny farany teo dia ny takaitra izay napetraky ny rivodoza “Haruna” izay nandripaka tokoa tamin’izany faritra izany. Iaraha-mahalala anefa fa faritra niharan’ny andiam-balala ihany koa izany faritra izany. Izany hoe maro ny voly potika vokatr’izany andiam-balala izany. Ankoatr’izay dia voa mafy noho ny asan-dahalo ihany koa ny faritra atsimo: betsaka ny rava fananana sy may trano vokatr’izany. Tsy ho mora arak’izany ny hamerina amin’ny laoniny ny fiainan’ny mponina any amin’izany faritra izany.

Namela takaitra mavesatra dia mavesatra tany amin’ny ilany atsimon’ny Nosy ny fandalovan’ilay rivodoza “Haruna”. Olona am-polony no maty vokatr’izany ary an-drivony maro koa ireo tra-boina sy tsy manan-kialofana hoy ny loharanom-baovao avy any an-toerana. Miisa 6 kosa ny maty vokatry ny fandalovan’ny rivo-doza “Haruna” tany amin’ny ilany atsimon’ny Nosy ka 2 no maty tany Morombe, 1 tany Betioky atsimo ary 3 tany ToloaraI, rah any vaovao ôfisialy. Fantatra ihany koa fa vaky vokatr’izany ny fefilohan’i Fierena any Toliara. Niteraka fahasimbana trano fonenana sy voly ary fotodrafitrasa maro dia maro izany tao an-tampon-tanan’i Toliary sy ny manodidina izany. Velaran-tany goavana dia goavana any amin’iny faritra iny no takotry ny atsanga vokatry ny fahavakisan’io fefiloha io. Fantatra ihany koa ankoatr’izay fa potika 80% ny tananan’i Morombe.
Ankoatr’iny loza voajanahary iny dia iaraha-mahalala ihany koa fa nitondra faisana tamin’ny fandripahan’ny valala iny faritra atsimon’ny nosy iny. Fambolena tamina velaran-tany maro dia maro no ripaky ny andiam-balala tato anatin’ny volana vitsivitsy araka ny tatitry ny tompon’andrikitra.
Iaraha-mahalala ihany koa fa nirongatra izay tsy izy ny asan-dahalo tany amin’izany faritra izany izay niteraka fahapotehan’ny fiompian’ireo mponina tamin’ny faritra maro tany an-toerana. Niteraka fahavoazana tamina tanana maro ihany koa izany asan-dahalo izany. Isan’ireo ny doro tanana sy ny vono olona.
Raha atao amin’ny teny tokana dia voa mafy tanteraka amin’izao fotoana izao ny faritra atsimon’ny Nosy. Fahavoazana izay mety hisy fiantraikany amin’ny raharaham-pifidianana izay hatao eto Madagasikara raha tsy misy fandraisana andraikitra haongana dia haingana hanarenana ny fahavoazana.