Migadra 28 taona i Mamodtaky

25/02/2013

Ny alin’ny asabotsy nifoha alahady teo no namoaka ny vokatry ny fitsarany mikasika ilay raharaha vono ilona teny Fenoarivo tamin’ny taona 2001 ny fitsarana Fratsay. Nomelohin’ny « Cour d'assises du Val-de-Marne » higadra 28 taona an-tranomaizina, ka ny 15 taona amin’izany dia tsy azo ivalozana i Mamodtaky Mamod Abasse , ilay voapanga ho tompon’nantoka tamin’ity vono olona mahatsiravina ity. Roa ambinifolo taona taty aoriana vao vita ny fitsarana ilay raharaha nahafatesana olona miisa 5 teny Fenoarivo. Natao tamin’ny alin’ny Sabotsy nifoha alahady teo ny fitsarana an’i Mamodtaky Mamod Abass, ilay teratany karana mizaka ny zom-pirenena frantsay, voapanga ho atidoha nikotrika ny fitifirana ny fianankaviam-badiny nandritra ny fivoriam-pianankaviana nataon’ireto farany. Fantatra ary izao fa nohelohin’ny fitsarana frantsay higadra 28 taona an-tranomaizina i Mamodtaky Mamod Abass. Sazy tsy azo ivalozana ny 15 taona amin’io.

Raha tsiahivina dia ny 22 avrily 2001 no nitrangan’izany vono olona izany, tao amin’ny fianankaviana Remtoula, izay tsy iza fa ny faiankaviam-badin’i Mamodtaky Mamod Abass ihany. Olona miisa 5 no maty teo no ho eo vokatry ny tifitra variraraka nataona olona telo izay niditra tampoka nandritra ilay fivoriam-pianankaviana. Zaza madinika ny roa tamin’ireo voatifitra ireo. Ankoatry ny maty dia nisy efatra ihany koa ny naratra mafy tamin’io fitifirana variraraka io. Tsy ity fitsarana tany amin’ny « Cour d'assises du Val-de-Marne » ity akory no voalohany nitsarana an’ity raharaha ity. Efa notsaraina teto Madagasikara ary notsaraina tatsy amin’ny Nosy La Réunion ity raharaha ity, saingy samy nanana ny filazany ireo fitsarana ireo. Ny fitsarana Malagasy moa dia nilaza ho tsy nahefa mihintsy nanoloana ity raharaha ity.Ny fitsarana tany La Réunion kosa dia efa nanafoana ny fanenjehana an’i Mamodtaky Mamod Abass, saingy nofohanan’ny fitsarana ambony izany didim-pitsarana izany.
Tsy nahefa ny fitsarana Malagasy
Tsara ihany koa ny mampatsiahy fa isan’ireo efa nigadra noho ity raharaha vono olona teny Fenoarivo ity ny zoadahin’i Mamodtaky Mamod Abass, i Babar Ali izay niampanga tena ho isan’ny atidoha tamin’izany vono olona izany. Voalaza fa maty tany am-pigadrana teto Madagasikara ity farany ity kinanjo hita tany Paris afaka taona vitsivitsy, ary dia nosamborina indray. Tamin’ny taona 2002 dia efa nafahan’ny fitsarana tatsy La Réunion i Mamodtaky ary efa niverina teto Madagasikara saingy noroahin’ny fanjakana Malagasy hiala teo Madagasikara ary natolotra ny fitsarana fratsay. Tamin’ny Taona 2003 no nametrahan’ny vadin’i Mamodtaky fitoriana teo anatrehan’ny fitsarana tany Paris momba ity raharaha ity. Nahagaga fa nonina an-tsokosoko teto Madagasikara indray i Mamodtaky tamin���io fotoana io ary teto no nisamborana azy ny 2 jolay 2005 izay nandefasana azy tany amin’ny fitsarana tany La Réunion. Notsaraina tany amin’ny Fitsarana tany La Réunion izy sy ireo olona hafa voapanga niaraka taminy tamin’io fotoana io ary nohelohin’ny fitsarana higadra mandram-pahafaty i Mamodtaky. Nampakatra fitsarana ambony izy tamin’io fotoana io ka nofohanan’ity sampam-pitsarana ity izany didy izany. Dia ny fitsarana tany Paris indray izany no tena namoaka ny didy farany mikasika ny raharaha Mamodtaky. Didim-pitsarana izay tsy azo ovana intsony.