Hihetsika ireo mpivarotra

25/02/2013

Hiroso amin’ny dingana manaraka ny vovonana ivondronan’ireo fikambanan’ny mpivarotra manodidina ny farihin’i Behoririka sy ireo etsy Malacam. Tsy inona izany fa ny fanaovana hetsika mivantana izay hanerena ny fitondram-panjakana mba hijery ny sosialim-bahoaka. Mialoha an’izao hetsika kasain’izy ireo hatao izao dia efa nanome fe-potoana 15 andro ho an’ny fitondram-panjakana ihany ko aizy ireo. Hifamontoana eny Behoririka arak’izany izy ireo androany, ary mety hisy ny firotsahana an-dàlambe.

Ahiana hiafara amin’ny firotsahana an-dàlambe ny hetsika fitakiana izay iraisan’ireo mpivarotra eny amin’ny manodidina ny ranomaibo eny Behoririka sy ireo mpivarotra etsy Malacam. Araka ny nambaran’izy ireo nandritra ny fihaonana izay nataony tamin’ny faramparan’ny herinandro lasa teo dia tsy nasian’ny fitondram-panjakana, indrindra ny fiadidiana ny tananan’Antananarivo resaka akory ny fe-potoana 15 andro izay nomen’izy ireo mba handraisana fanampahan-kevitra entitra momba ny sosialim-bahoaka. Tapa-kevitra ny hiroso amin’ny dingana manaraka arak’izany izy ireo amin’ity androany ity, ka ny maro tamin’izy ireo dia nilaza fa vonona ny hirotsaka an-dàlambe mihintsy.
Marihina fa tsy ireo mpivarotra ihany no hanatevin-daharana an’ity hetsika ity. Araka ny fantatra dia ireo mponina izay niharan’ny tsindry hazolena vokatr’izao fitondram-panjakana izao dia hifanome tanana amin’izany hetsika izany avokoa. Isan’izany ireo olona very tany noho nykely tsy mba mamindro nataon’ny mpanam-bola. Torak’izany koa rava trano tamin’ny hetsiky ny fiadidiana ny tananan’Antananarivo. Heverina ho isan’ny mety hanatevin-daharana ny fitakiana ihany koa ireo mpivarotra amoron-dàlana avy amin’ny faritra hefa eto Antananarivo noho ireto farany isan’ny mizaka ny tsy eran’ny aina noho ny afitsoky ny kaomina Antananarivo.
Ho an’ireo mpivarotra etsy Behoririka manokana dia tsiahivina fa tsy ankasitrahan’izy ireo ny fandaminana izay napetraky ny fiadidiana ny tsena eto amin’ny tananan’Antananarivo izay tsy telo andro monja azy ireo ahafahana mivarotra ao anatin’ny herinandro iray. Araka ny nambaran’izy ireo dia midi-trosa vokatr’izany izy ireo.
Fikamabana ampolony maro izy ireo no miksa ny hanatanteraka an’ity hetsika ity. Eny Behoririka no fotoana ifanomezany amin’ity androany ity. Fidinana an-dàlambe miaraka amin’ny sora-baventy no isan’ny fandaharam-potoan’izy ireo.