Miantso vonjy iraisam-pirenena ny fanjakana

26/02/2013

Tsy ho voaarina ny fahavoazana any Toliara taorian’ny fandalovan’ny rivodoza “Haruna”, raha miantehitra amin’ny heriny samirery i Madagasikara. Fantatra, arak’izany, fa niantso ny fanampiana iraisam-pirenena isika, tamin’ny alalan’ny ministeran’ny Raharaham-bahiny. Araka ny atontan’isa azo farany dia mahatratra 18 ny maty vokatr’izany rivo-doza izany tany amin’iny ilany atsimon’ny Nosy iny ary 16 no tsy hita popoka. Mahatratra 22 498 kosa ireo tra-boina. Mbola miahiahy ny amin’ny mety hiakaran’ny rano ny mponina any an-toerana, raha efa mba somary nidina ny haavon’izany hatramin’ny omaly. Mbola tsy nanomboka kosa hatramin’izao ny fanarenana ny fefilohan’i Fiherena.

Nifantoka tamin’ny famonjena ireo mponina mbola tavela tany amin’ireo tanana dibo-drano ny tao antampon-tananan’i Toliara omaly. Mbola sarotra arak’izany ny hilaza fa azo antoka ny atontan’isa momba ny fahavoazana taorian’ny fandalovan’ny rivodoza “Haruna” izay namela takaitra goavana dia goavana tany amin’iny ilany atsimon’ny Nosy iny. Na izany na tsy izany, araka ny isa navoakan’ny BNGRC (Bureau national de gestion des risques et des catastrophes) dia mahatratra 18 amin’izao fotoana izao no maty vokatr’izany andro ratsy izany tany amin’iny faritra iny (02 tany Morombe, 01 tany Betioky atsimo, 11 tany Toliara I, 3 tany Vangaindrano ary 1 Sakaraha). Miisa 16 kosa ireo tsy hita popoka tany amin’ny distrikan’i Toliara I, 81 no naratra (32 tao Toliara I, 8 tany Betioky atsimo, 3 tao Sakaraha, 9 tany Bekily ary 29 Toliara II). Mahatratra 22 498 ireo traboina any amin’iny faritra iny ihany : 2 261 ny ao Toliara I, 5 358 any Sakaraha, 5 441 any amin’ny distrikan’i Toliara II, 2 778 any Betioky atsimo ary 2 880 any Morombe, 3 780 any Ampanihy. Mahatratra 9 965 ireo tsy manan-kialofana(892 any Toliara I, 2 000 any Sakaraha, 2 271 any Toliara II, 654 any Betioky atsimo, 368 any
Morombe ary 3 780 Ampanihy andrefana). Maro dia maro ihany koa ny trano rava vokatry ny fiakaran’ny rano. Miisa 1 120 izany araka ny isa avy amin’ny BNGRC (100 tany Sakahara, 120 tany amin’ny kaomina ambanivohitra Antanimieva, distrikan’I Morombe, 700 tao Toliara
II ary tany 200 Betioky atsimo). Mahatratra 2 776 kosa ny isan’ny trano izay lasan’ny rivotra ny tafony. 1 438 kosa ny trano dibo-drano. Maro ihany koa ny foto-drafitr’asam-panjakana izay simba (117 biraom-panjakana: 32 tany Morombe, 31 tany Betioky atsimo, 11 tany Toliara I, 34 tany
Sakaraha, 8 tany Toliara II ary 1 tany Ampanihy.
Santionany amin’ireo isa hita tao amin’ny tatitry ny BNGRC omaly tamin’ny efatra ora hariva ireo nambara ireo. Marihina fa ny fahavakisan’ny fefilohan’ny Fiherena no tena nahatonga ny fahavoazana raha ho an’ny tananan’I Toliara manokana. Araka ny fantatra dia Fokontany miisa folo any an-toerana (Anketraky, Andalavay, Antaninarenina, Andaboly, Ambohitsabo, Antongobory, Ankenta, Ankilifolo, Ankabo, Antaravay) no dibo-drano tanteraka. Dibo-drano torak’izany ihany koa I Mitsinjo sy Maromiandra ao amin’ny distrikan’i Toliara II.
Tsara ny manamarika fa efa nidina ny haavon’ny rano tamin’ny omaly. Saingy mbola tsy nanomboka hatreto ny fanarenana ny fefilohan’i Fiherena. Vokatr’izany dia mbola ahina mafy ny hiakaran’ny rano indray raha toa ka avy ben y orana.

Ho sarotra dia sarotra arak’izany rehetra izany ny fanarenana ny fahavoazana naterak’iny rivodoza iny, indrindra ny tao Toliara sy ny manodidina azy. Manoloana izany dia nanao antso avo tamin’ny fianankaviambe iraisam-pirenena ny finjakana Malagasy tamin’ny alalan’ny ministeran’ny Raharahambahiny mba ho famonjena ireo traboina sy ho fanarenana ny fahavoazana nateraky ny rivo-doza.