Mitaky fampifanandrifiana ny mari-karama

28/02/2013

Nifamotoana teny amin’ny ministeran’ny Asa sy ny Asam-panjakana ary ny Lalana sosialy, omaly ireo mpikambana ao amin’ny vondron’ny sendikan’ny mpiasam-panjakana. Nanao hetsika ho fitakiana ny famoahana ny didim-panjakana ho fampiharana izay notinapaka nandritra ny fihaonamben’ny mpiasam-panjakana izay natao tamin’ny volana septembre tamin’ny taon-dasa ireto mpiasam-panjakana ireto. Isan’ny notakian’izy ireo tamin’izany ny fampiharana ny fampifanandrifiana ny mari-karaman’ny mpiasam-panjakana.

Hetsika fanairana. Izay no notontosain’ny sendikan’ny mpiasam-panjakana izay nifamotoana manoloana ny biraon’ny ministeran’ny Asa sy ny Asam-panjakana ary ny Lalana sosialy, omaly. Ho fitakiana ny fampiharana ireo teboka maromaro izay notinapaka nandritra ny fikaonandohan’ny mpiasam-panjakana izay natao tamin’ny volana septambra tamin’ny taon-dasa tany amin’ny CCI Ivato no anton’izany hetsika nataon’ny sendikan’ny mpiasam-panjakana izany. Isan’ny notinapaka tamin’izany fikaonandoha izany ny fampifanandrifiana ny marin-karaman’ny mpiasam-panjakana sy ny famerana izany. Nambaran’i Rakotondraibe Simon Richard, filohan’ny fivondronan’ireo sendikan’ny mpiasam-panjakana fa efa tamin’ny taona 1975 no nisian’ny didim-panjakana namerana ny marin-karama izay manan-kery amin’izao fotoana izao. Arak’izany didim-panjakana izany dia 275 ny mari-karama ambany indrindra ary 2601 kosa ny mari-karama ambony indrindra. Tamin’ny taona 2003 kosa no nivoahan’ny sata ankapobeny mifehy ny mpiasam-panjakana izay mamaritra ny amin’ny tokony hampiakarana ny mari-karaman’ny mpiasam-panjakana sy ny fandaminana izany. Hatramin’izao anefa dia mbola tsy nisy governemanta sahy namoaka didim-panjakana mametra izany. Nandritra ny fihaonamben’ny mpiasam-panjakana izay notontosaina tamin’ny volana septambra tamin’ny taon-dasa kosa no nanapahana fa firosoana amin’izay fampifanandrifiana ny mari-karama sy ny fampiakarana ny mari-karama farany ambany izay. Tapaka tamin’izay fa 800 ny mari-karama ambany indrindra ary 7990 ny ambony indrindra. Araka ny fanazavan’ny filohan’ny vondron’ny sendikan’ny mpiasam-panjakana ihany dia manodidina ny 200 000 ariary no tokony ho karaman’ny mpiasam-panjakana manana mari-karama 800.
Hetsika ara-drariny
Ny fanazavan’ity tomponandraikitra sendikaly ity ihany koa no nahafantarana fa efa intelo no nandinihina an’ity raharaha fandaminana ny mari-karaman’ny mpiasam-panjakana ity saingy tsy mbola nisy fanampahan-kevitra hatramin’izao. Nambarany ihany koa fa efa nampanantenaina ny hivoahan’izany tamin’ny 15 febroary teo kanefa tsy nivoaka. Mitaky ny hananganana komisiona manokana handinika indray ny mikasika izay fandaminana ny mari-karaman’ny mpiasam-panjakana izay ny ministeran’ny Vola araka ny fanazavany kanefa efa nandalo fandinihana lamina dia lalina izany , hoy ny fanamarihany.
Ho fitakiana ny hamoahan’ny fitondram-panjakana ny didim-panjakana manome toky ny fametrahana izany fandaminana ny mari-karaman’ny mpiasam-panjakana izany ary no votoatin’ny hetsika izay nataon’ireo sendika tamin’io omaly io. Nambaran’izy ireo fa tsy mitaky ny hampiharana izany avy hatrany akory izy ireo. Ny governemanta hitsangana amin’ny Repoblika fahaefatra no heverin’izy ireo fa tokony handry an-tanana ny fanatanterahana izany.
Tsara ny manamarika fa tonga namely ny antson’ireo mpiasam-panjakana mivondrona amin’ny sendika ireo ny minisitry ny Asa sy ny Asam-panjakana ary ny lalana sosialy tamin’io hetsika omaly io. Nambaran’ny minisitra Tabera Randriamanantsoa fa rariny raha manao izao hetsika fanairana izao ny mpiasam-panjakana”. Marihina fa nizotra tao anatin’ny filaminana tanteraka ity hetsika fanairana nataon’ny sendikan’ny mpiasam-panjakana omaly ity.