Nanolotra 100 tapitrisa ariary ho an’ny tra-boina

28/02/2013

Taorian’ny fahavoazana lehibe nateraky ny fandalovan’ny rivodoza Haruna tao amin’ny morontsiraka atsimo andrefan’i Madagasikara ny 22 febroary lasa teo, dia nanambara ny fanjakana amerikana fa hanolotra fanampiana maika mitentina 100 tapitrisa ariary (50.000 dolara amerikana) ho an’ireo tra-boina. Voinkava-mahatratra. Miara-mientana amin’ny vahoaka malagasy i Etazonia ary maneho fiaraha-miory amin’ireo niharam-boina noho ny fahavoazana lehibe tamin’ny fandalovan’ny rivodoza Haruna. Vola mitentina 100 tapitrisa ariary no hatokany amin’izany. Fikambanana iray tsy miankina no hitantana ny vola hanaovana asa fanampiana ny maha-olona sy fizarana kojakoja ilaina amin’ny hamehana. “Azon’ny mpiara-miombona antoka ampiasaina dieny izao io fanampiana io ividianana kojakoja fitandremam-pahasalamana sy labasy,” hoy Ramatoa Aleathea Musah, talen’ny Sampan-draharaha miandraikitra ny Fahasalamana, ny Mponina sy ny Sakafo ara-pahasalamana ao amin’ny USAID Madagasikara.

“Manohy ny fiaraha-miasa amin’ireo mpiara-miombona antoka aminay izahay hahafantarana ny tena filan’ny vahoaka eo an-toerana,” hoy ihany izy.
Haka fepetra haingana ny fanjakana amerikana, amin’ny alalan’ny USAID sy ny mpiara-miombona antoka, ka hizara labasy plastika sy kojakoja fampiasa amin’ny hamehana sy fitandremam-pahasalamana any amin’ireto faritra manaraka ireto: Sakaraha, Bekily, Amboasary, Beloha Tsihombe, Ambovombe, Taolagnaro, Morondava, Ankazoabo, Benenitra ary Manja. Mora andairan’ny tondra-drano sy ny rivodoza tokoa i Madagasikara mandritra ny taom-pahavaratra, eo anelanelan’ny volana oktobra sy aprily.
Eo anatrehan’ny voina entin’ny rivodoza Haruna, dia maneho ny fahavononany hanampy hatrany ny olona tena marefo eto Madagasikara ny fanjakana sy ny vahoaka amerikana. I Etazonia moa no firenena mpamatsy vola goavana indrindra an’i Madagasikara. Fanampiana mihoatra ny 132 lavitrisa Ariary (na 66 tapitrisa dolara amerikana) no homen’ny USAID ny vahoaka malagasy amin’ity taona ity, izay hampiasaina amin’ny fandaharan’asa maro toy ny fahasalamana, ny fanjariana ara-tsakafo, ny rano ary ny fahadiovana. Etsy an-danin’izany dia mpilatsaka an-tsitrapon’ny Corps de la Paix miisa mihoatra ny 130 no miasa any amin’ny faritra tena mahantra sady saro-dàlana eto amin’ny firenena.