Kandida telo no hifaninana

28/02/2013

Tapitra omaly tamin’ny mitatao vovonana ny fametrahana ny filatsahan-kofidiana ho filohan’ny Antenimieran’ny varotra Toamasina (CCIT), nataon’ireo vondrona samihafa ao amin’izany rafitra izany. Araka ny loharanom-baovao avy any an-toerana dia kandida avy amina vondrona telo ihany no nametraka ny filatsahan-kofidian’izy ireo. Tsy iza ireo fa ny vondron’ny mpanondrana letchis na ny GEL tarihan’I Rafidimanana Narson, ny vondron’ny mpandraharaha ara-pizahantany n any GITH izay tarihan’i Mamy Narove ary ny vondron’ny mpanao trano sy asa vaventy Malagasy n any SEBATP, tarihan’i Ndalana Thomas. Tsy nnandrotsaka kandida kosa ny GEPAT izay mifanolana amin’ny GEL hatrany ampiandohan’ny fanomanana ny fifidianana.

Toy izay koa ny vondrona GEPUTOA ary ny GPM. Raha ny zava-misy eo amin’ny vondrona nirotsaka hofidiana, dia tsy sarotra amin’ny vondrona GEL ny handrombaka ny toerana be indrindra eo anivon’ny CCI Toamasina sy ny handrobahany ny filohan’izany rafitra izany. Raha ny eo amin’ny mpikambana nangataka ny ho mpifidy kosa, dia nahatratra 167 ny antontan-taratasy voarain’ny CCI Toamasina ka ny 56 tamin’izany no efa voamarina ny maha-mpifidy azy. Anio amin’ny 05ora hariva no hifarana ny fisoratana anarana ho an’ny maha-mpifidy ka ho fantatra amin’izay ny tena isany marina.
Ankoatra izay, dia nambaran’i Mbola Rajaonah filoha mpitarika ny “comite ad’hoc” fa natao ny fanemorana ny fifidianana ny mpikamban’ny CCI Toamasina, noho ny fangatahan’ireo vondrona sasany teny anivon’ny minisitera ny Varotra ka nekena ary hanomanana ny fifidianana manaraka izay tsy hiemotra intsony ny 16 martsa ho avy izao. Ny solon-tenan’ny minisitera tonga ao Toamasina kosa dia nilaza fa mizotra ara-dalana ny fanomanana ny fifidianana. Natao mialoha ny ao amin’ny CCI Toamasina noho ireo mpikambana ao aminy tsy olom-boafidy fa olom-boatendry avokoa. Ny any amin’ny CCI hafa kosa dia any amin’ny faraparan’ny taona any vao hisy ny fanomanana izany. Fifidianana madio, mangaraharaha, eken’ny mpikambana rehetra no tanjona izany no nahatonga ny CCI Toamasina nampiasa “logiciel” manokana handrindrana sy hanamarinana ireo mpifidy.