Naondrana any ivelany ?

01/03/2013

Ankoatry ny hetaheta te-hahafantatra ny tena antony marina nahatonga ny filohan’ny tetezamita hanova ireo vato teo amin’ny tohotoho-baton’Antaninarenina dia mametram-panontaniana ihany koa ny maro, amin’izao fotoana izao, mikasika ny nanaovana ireo vato nesorina teo amin’ireo tohotohotra ireo. Maro ny milaza fa vato manana ny maha-izy azy amin’ny lafiny rehetra, indrindra amin’ny tantaram-pirenena sy ny tantaran’Antananarivo ireo vato ireo, raha tsy hiteny afa-tsy noho izy ireo naorina tamin’ny andron-dRanavalona voalohany. Lafo vidy eo anatrehan’ny mpahalala, arak’izany ireny vato ireny.

Nalefa aiza ireo vato nesorina teo amin’ny tohotoho-baton’Antaninarenina sy Ambondrona? Io no fanontaniana apetraky ny maro amin’izao andro vitsivitsy mialoha ny hataperan’ny asa fanarenana ireo tohotoho-bato ireo, araka ny vinavina tamin’ny fanombohan’ny asa. Antony maro no mahaonga ny mpanara-baovao hametraka izany fanontaniana izany. Voalohany dia nohon’ny lanja ara-tantara ananan’ireo vato ireo. Raha tsiahivina dia tamin’ny 180 taona lasa, izany hoe tamin’ny andron’ny mpanjaka Ranavalona voalohany, tamin’ny taona 1833 no nanamboarana ireo tohotoho-bato ireo. Midika izany fa mampatsiahy, na koa manambara ny fahefana teo am-pela-tanan’izany mpanjaka izany ireo vato ireo, toy ny nananan’ny satrok’i Ranavalona Voalohany an’izany lanja izany ihany koa. Iaraha-mahalala anefa fa very nandritra ity fitondrana tetezamita ity izany satroky ny mpanjaka izany, ary hatramin’’izao dia tsy hita izay nalehany, na dia nilokaloka ny tsy maintsy ahita izany aza ny mpitandro filaminana.
Ankoatr’izay lafiny ara-tantara sy ny mety ho finoana ny momba azy izay dia fantatra ihany koa fa vato isan’ny tsara karazana indrindra ireo vato teo amin’ireo tohotohotra roa ireo sy ny faritra hafa teto Antananarivo ihany koa. Mazava loatra fa tsy azo oharina amin’ireo vato vaovao izay vao napetraky ny orin’asa Colas izay manao fanarenana amin’izao fotoana izao ireo vato taloha teo. Izany hoe azo antoka fa tsy hitovy amin’ny faharetan’ireo vato teo aloha sy ny vato vaovao izay vao napetraka amin’ireo tohotra ireo, na dia tsara endrika noho ny teo aloha aza ireo vaovao. Tsy isalasalana ary ny milaza fa lafo vidy lavitra noho ireo vato vao narafitra eo amin’izany toerana izany ireo vato izay nesorina teo.
Tahirim-bakoka
Marihina fa isan’ny natsidiky ny filohan’ny tetezamita tamin’ny lahateny nataony nandritra ny fanombohana ny asa fanarenana teny Antaninarenina ny fisian’ny vato avy aty Madagasikara izay nandrafetana làlana tany Paris renivohitra Frantsay. Mazava arak’izany fa manana ny maha-izy azy tokoa ireo karazam-bato ireo. Azo eritreretina arak’izany ny mety hisian’ny fikasana handefa ireo vato teo amin’ny tohotoho-baton’Antaninarenina sy ny teo Ambondrona ho any ivelany.
Tsara ny mampatsiahy fa araka ny nambaran’ny filohan’ny tetezamita dia vola avy aminy no nanaovana izao fanarenana ny tohotohotra Antaninarenina sy Ambondrona izao. Mety hanan-jo hampiasa arak’izay tiany hanaovana azy ireo vato nesorina tamin’izany toerana izany, mazava loatra ny tenany. Tsara anefa ny mampatsiahy fa azo kilasiana ho vakoka ihany koa ireo vato ireo, toy ireo vato nandrafitra ny rova. Ireto farany izay naverina tamin’ny toerany taorian’ny famaizana nahazo ny rova. Marihina fa hatramin’izao dia tsy nanambara ny hanaovana ireo vato an-drivony maro izay nesorina teo amin’ny tohotohobaton’Antaninarenina sy Ambondrona ny fitondrana tetezamita. Tamin’ny 14 janoary 2013 no nanombohan’ny asa fanarenana ireo tohotohotra ireo ary amin’ny 8 marsa izao no vinavinaina havitan’ny asa.