Nahitam-bokatra ny “operation mpanendaka”

01/03/2013

Nanaatontosa hatsika manokana nampitondrainy ny anarana hoe “operation” mpanendaka ny Force d’Intervention de la Police (FIP) Toamasina. Taorian’ny hetsika nataon’izy ireo tao Valpinson sy Ankirihiry dia tao anivon’ny tsenan’Ambolomadinika indray izy ireo tamin’ity herinandro ity no nanao izany. Nisy ary ny vokatra azo izay nahasamborana ireo efa-dahy isan’ny sefon’ireo “bandy kely” mpanendaka eo amin’ny tsenan’Ambolomadinika. Isan’ny voasambotra I Jean Eric, 17 taona izay fanateran’ireo mpanendaka ny zavatra azony sy mpizara ny vola amin’ireo ekipany. Voasambotra ihany koa i Gregoire 17 taona izay manana fahaizana manokana amin’ny halatra finday anaty trano fisotroana sy ireo olona ambony posy ary fangaronana paosy. Voalaza fa amidiny sy ny ekipany eo amin’ny “bazarim-bolondolo” Ambolomadinika amin’ny vidiny 20.000 ariary ka hatramin’ny 30.000 ariary ireo finday azony raha efa tonta izany.

Mahatratra 50.000 ariary ka hatramin’ny 100.000 kosa ireo finday tsara sy hiaka farany. Nosamborin’ny mpitandro filaminana ihany koa I Clement 21 taona izay isan’ireo mpividy ny finday halatra sy mpanovana izany ary mpanao “decodage” ireo finday misy fiarovana manokana. Isan’ny voasambotra ihany koa i Paul, 21 taona izay mpisambotra sy mpampitahotra ireo olona endahina ka ireo ekipany no misava ny paosy sy mangarona ny poketra.
Antsy tsotra sy “poignard” no fampiasan’izy ireo amin’ny asa fanendahana ataony. “Tsy ny fitaovana no sakana ho anay amin’ny fametrahana ny filaminam-bahoaka, tsy ny resaka ataon’olona momba anay no ataonay ho olana amin’ny mpiasam-bahoaka natao hiaro ny vahoaka sy ny fananany. Raha mbola eto ny tenako sy ny ekipako, tsy maintsy miasa hatrany izahay ho filaminam-bahoaka satria izay sahy ihany no mandresy” hoy ny komanda ny FIP Toamasina Officier Rafaliaro Jules nilaza ny heviny amin’ny fametrahana ny fahandriampahalemana ao Toamasina. Ankoatra izany, isany “zone rouge” amin’ny tsy filaminana ao Toamasina ny ao Mangarivotra, Ambolomadinika, Mangarano II, Valpinson; misy ny fanaraha-maso akaiky ireo fokontany ireo ankehitriny ao Toamasina ao.