Nisy tranga tamin’ny volana febroary

01/03/2013

Mirongatra izay tsy izy ny fanolanana zanaka vavy raha ny zava-misy any Toamasina no resahina. Ho an’ny volana febroary teo fotsiny dia nahatratra efatra ny trangana fanolanana zanaka nataona raim-pianankaviana tany amin’ity tanana ity. Manodidina ny 05 hatramin’ny 25 taona avokoa ireo zazavavy voaholana ireo ary ireo ray mitaiza ny zanany vavy irery aorian’ny fisarahana eo aminy sy ny vadiny ary mpiasa an-trano ihany koa no mahatonga ity tranga mamoafady ity izay marihina fa sazy am-ponja an-terivozin’ny no miandry izay tratra amin’izany.

Ny voalohany tamin’ireo tranga ireo dia ilay tatsambo iray monina ao Tanambao Verrerie izay nanolanana ny mpanampiny vao 13 taona avy any Mahanoro. Efa naharitra tapa-bolana no nanaovan’ity tatsambo ity ny filàny tamin’ity zazavavy mpanampy ity. Simba tanteraka ilay zazavavy araka ny tatitry ny mpitsabo. Ny tranga faharoa kosa dia ny 22 febroary teo mbola teny Tanambao Verririe hatrany no nitranga ny raharaham-panolanana. Ny ray niteraka ity zazavavy vao 05 taona monja no nahavita nanolana an-janany. Na vao sambany aza no nanao izany ity ray ity dia tena simba tanteraka ity zazavavy 05 taona voaholana ity. Araka ny fanazavana azo dia fony ity zazavavy ity herintaona no nisaraka ilay rangahy sy ny vadiny. Izy no nisahana ny fitaizana ny zanany noho ny tsy fanomezany izany ny reny nandritra ny fisarahana. Nefa vao efa-bolana izay dia nifamerina indray ilay rangahy sy ramatoa, ka tao anatin’izay no nahavitan’ity ray ity nanolana an-janany. Ny tranga fahatelo dia nataona raim-pianakaviana 37 taona tao Tsararivotra Batainaomby, izay nahavita nanolana ny zanany vavy vao 07 taona ka nahavita ny namono azy mihintsy ihany koa taorian’ny fahavitany ny filany tamin’ny fidarohana mafy ity zanany vavy ity. Ny tranga farany dia niseho ny 27 febroary teo tokony taimn’ny 09ora alina tao amin’ny “gare routière” Tanambao V. Tovovavy 25 taona nandeha posy bisikileta no niharan’ny fanolanana tambam-be nataona an-dian-jatovo. Ilay nitondra ity tovovavy ity no nampandre ny polisy ary mbola tratra ambodiomby teo am-panaovana firaisana ara-nofo tamin’ilay tovovavy ny iray tamin’ireo mpanolana mpitamba-be. Olona 04 no efa voasambotra, nefa araka ny vaovao dia manodidina ny 07 ireo nahavanona izany. Ireo olona mpanolana rehetra ireo dia miandry ny fitsirana azy am-ponja ao Ambalatavoahangy avokoa akehitriny.