Novakian’ny jiolahy

01/03/2013

Fitaovana saro-bidy maromaro no lasan’ny jiolahy tao amin’ny hopitaly manara-penitra any Toamasina. Ny alin’ny talata teo no nisian’izany vaky trano izany. Tambazana volabe izay manome vaovao momba ireo entana very ireo. Mitaraina noho ny tsy fananan’izy ireo birao kosa ireo mpitsabo ao amin’izany toeram-pitsaboana izany. Lasibatry ny vaky trano ihany koa ny hopitaly manara-penitra tany Toamasina. Loharanom-baovao avy ao amin’ny fitantanana izany hopitaly izany no nahafantarana fa ny talata alina nifoha ny alarobia teo no nitrangan’izany vaky trano izany. Mbola ny vaovao avy amina tompon’andraikitra tao amin’izany hopitaly izany ihany koa no nahafantarana fa fitaovana lafo vidy toy ny solosaina sy fahitalavitra “Ecran plat LED – LCD” maromaro no very tao amin’ny hopitaly “manaram-penitra” Toamasina vokatr’ity vaky trano ity.

Marihina ihany koa fa araka ny fanambarana dia tambazana vola be izay tsy fantatra hatreto ny sandany, ireo olona manome vaovao hanamorana ny fahatrarana ireo jiolahy nangalatra ireo fitaovana izao. Ho tambazana volabe ihany koa ireo mpitandro ny filaminana mahasambotra ireo jiolahy nahavanona ireo halatra ireo.

Tsy manara-penitra

Ankilan’izay resaka vaky trano nitranga tao amin’ny hopitali manara-penitra Toamasina izay dia fantatra ihany koa fa velon-taraina ireo mpitsabo nafindra hiasa ao amin’ity trano fitsaboana reharehan’ny fitondrana tetezamita ity. Dradradradraina fa “tena manaram-penitra sy tsy misy tsara sy tonga lafatra toa azy ny aty amin’ny fari-dranomasina Indiana sy aty afrika” araka ny kabarin’ny filohan’ny tetezamita tamin’ny fitokanana azy, kanefa tsy manana birao hiasana ireo mpitsabo, hanaovany ny asany ankoatra ny fitsaboana, hoy ny fitantaran’ireo mpitsabo ireo. Ankoatr’izay, ity hopitaly “manaram-penitra” ao Toamasina ity koa no hopitaly tsy manana “tranom-paty” sy tsy manana “incineration” na fandorana ireo fitaovana avy nampiasaina tsy hiparitahan’ny aretina sy ny loto samy hafa, izay tsy fahita eran-tany amin’ireo hopitaly “tena manaram-penitra” rehetra aty amin’ny fari-dranomasina Indiana sy afrika ary ny hopitaly oniversitera ao Toamasina fotsiny.