Manazava ny Eveka

02/03/2013

Tsy afaka ny hangiana manoloana ny resabe etsy sy eroa manodidina ny fametraham-pialan’ny Papa Ray Masina Benoit XVI, ny fiangonana Katolika maneran-tany; toraka izany koa ny eto Madagasikara. Nitondra fanazavana mikasika izany ny Fiombonamben’ny Eveka eto Madagasikara, araka ny fanambarana nataon’ny sekretera jeneraly, Mgr Philippe Ranaivomanana. Noho ny fahosana nateraky ny fahanterana izay tsy ahafahany manatanteraka an-tsakany sy an-davany ny adidy maha Papa azy intsony no an’iny fametraham-pialana tamin’ny faha-12 febroary 2013 iny. Nitsahatra tamin’ny andraikitra maha filohan’ny Fiangonana Katolika ny faha-28 febroary 2013 teo moa ny Papa Ray Masina Benoit XVI. Miantso ny mpino kristiana rehetra hitrotro am-bavaka ny fivoriamben’ireo kardinaly, rafitra entina hifidianana ny Papa vaovao ny fiombonamben’ny Eveka eto Madagasikara ary nanambara fa nitsilo ny Fiangonan’Andriamanitra hatrany ny Fanahy Masina ary inoana fa mbola hitantana amin’izao kihon-dalana hatrehiny izao.

Niteraka resabe tokoa iny fametraham-pialana nataon’ny Papa Ray Masina iny. Voalohany teo amin’ny tantaran’ny Fiangonana Katolika tokoa mantsy no nisy filohan’ny Eglizy nametra-pialana tahaka izao. Maro ihany koa ny zava-niseho teo anivon’ny Fiangonana, raha tsy hiresaka afatsy ny fanadihadiana mikasika an’ny Mère Teresa, ny ny fitoriana momba ny Mgr Keith O’Brien, ny zava-nitranga tany Irlande, sns.
Etsy an-danin’izany, nitondra ny fomba fahitany ny raharaham-pirenena ihany koa ny fiombonamben’ny Eveka. Manentana ny kristiana Katolika rehetra manerana ny Nosy, indrindra ireo fikambanana maro, toa ny Vaomieran’ny Fahamarinana sy Fiadanana, mba hijery izay adidy tandrify azy avy amin’ny fiomanana sy fiatrehana izany fifidianana izany ny fiombonamben’ny Eveka, amin’ny fanabeazana ny olom-pirenena sy ny fanaraha-maso ny fifidianana. Miantefa amin’ny CENI-T ihany koa anefa izany antso izany, indrindra ny fanatontosana an-tsakany sy an-davany ny lafiny ara-teknika sy ara-pitaovana. Namafisin’izy ireo fa ny fifidianana no hany hirika hivoahan’ny firenena amin’izao krizy lalina izao. Nampahatsiahy ireo datim-pifidianana moa ny fiombenamben’ny Eveka.
Mikasika ny voina izay manjo ny vahoaka any Toliara kosa indray dia nanome toromarika ireo diosezy tsirairay miaraka amin’ireo fikambanana isan-karazany, toa ny Caritas, amin’ny fanagonana entana sy vola sy ny fikarakarana ny fandefasana izany any an-toerana ny fiombonamben’ny Eveka. Mitaona ny olom-pirenena tsy an-kanavaka ihany koa mba hifanome tanana amin’ireo havana tra-boina sy namoy fianakaviana vokatry ny fandalovan’ny rivodoza. Fehiny, miditra tanteraka amin’ny fiainam-pirenena ny Fiangonana Katolika eto Madagasikara. Azo heverina ihany koa fa tsy mankasitraka ny mbola hanemorana ny fifidianana isan’ambaratongany.