Nosakanana fanindroany omaly

02/03/2013

Tsy nahazo niakatra tao amin’ny fiaramanidin’ny kompania fitaterana afrikanina tatsimo Air Link indray omaly ny vadin’ny filoha teo aloha, Lalao Ravalomanana, raha nikasa ny handray izany fiara-manidina izany hihazo an’i Madagasikara. Tsy tanteraka indray izany ny fikasan’ity vadin’ny filoha teo aloha ity hamangy ny reniny marary eto Madagasikara, araka ny fangatahana maro efa nataon’ny fianankaviany. Araka ny fampitam-baovao avy amin’ny ankolafy Ravalomanana izay nanao valan-dresaka ho an’ny mpanao gazety omaly tolakandro dia nahazo baiko avy amina tompon’andraikitra eto Madagasikara tsy hitondra an-dRamatoa Lalao Ravalomanana indray ny kompaniam-pitaterana afrikana tatsimo Air Link. Omaly tolakandro tokony ho tamin’ny telo no nisehoan’izany tatsy Afrika atsimo raha iny efa saika hiondrana amin’ny fiaramanidina iny i Lalao Ravalomanana.

Baiko avy amin’ny tale jeneralin’ny ACEM, araka ny fantatra no nahatonga ity kompania afrikana tatsimo ity tsy hitondra an’i Lalao Ravalomanana. Nambaran’ny ankolafy Ravalomanana fa nilaza aloha ity Tale jeneraly ity fa efa tsy misy ny fisakanana an’i Lalao Ravalomanana hody an-tanindrazana. Saingy rehefa nohadiadiana lalina ny tenay dia nilaza ihany fa « izy mihintsy no tsy manome lalana ny vadin’ny filoham-pirenena teo aloha hiverina an-tanindrazana ». Nambarany fa n’iza n’iza dia tsy misy afaka manova izany fanampahan-keviny izany. Fanindroany izany izao, arak’izany, ny tsy nafahan’ny vadin’ny filoha teo aloha hiverina an-tanin-drazana satria afak’omaly dia mbola tahaka izany ihany no nitranga.
Tsara ny mampatsiahy fa efa namoaka fanambarana ôfisialy izay milaza ny fanomezany alalala ny vadin’ny filoha teo aloha hiverina an-tanin-drazana hitsabo ny reniny marary ny praiminisitra lehiben’ny governemanta. Efa nanambara ampahibemaso ihany koa ny filohan’ny tetezamita fa tsy misakana ny fahatongavan’ny vadin’ny filoha teo aloha ny tenany na dia nametraka fepetra ihany aza ny tenany. Mipetraka arak’izany ny fanontaniana : tsy mandray baiko avy amin’ny filohan’ny tetezamita sy ny praiminisitra lehiben’ny governemanta ve ity tale jeneraly ity ? Miahiahy ny amin’ny fisian’ny fanodikodinana sy ny fiatsaram-belatsihy mikasika ity raharaha fampodina ny vadin’ny filoha teo aloha ity ny avy ao amin’ny ankolafy Ravalomanana. Zava-misy izay mampametraka ahiahy amin’ny fahavononan’ny rehetra amin’ny fametrahana fitoniana eto Madagasikara mba hialana amin’izao krizy izao.