Hiakatra fitsarana

02/03/2013

Samy nametraka fitoriana teo anatrehan’ny fitsarana tany Tolagnaro na ny vahoaka ao anatin’ny fikambanana Fagnomba na ny fiadidiana ny orinasa Fasimainty sy ny fiadidiana ny Faritra Anôsy. Nitory ireo mpanao fihetsiketsehana notarihan’ny Fagnomba tamin’ny fanatsakatsanana ny asan’ny orinasa ka niteraka fatiantoka tao aminy ny orinasa Fasimainty. Ny Fagnomba kosa nitory ny fiadidina ny Faritra noho ity farany tondroin’izy ireo naniraka mpitandro filaminana nitifitra tamin’ny bala tena izy. Hatao amin’ny herinandro io ny fitsarana

Mitodika any amin’ny fitsarana indray ny mason’ny mpanara-baovao any Tolagnaro. Arakan y loharanom-baovao any an-toerana dia hiakatra fitsarana amin’ny talata ho avy ion y raharaha ifanolanan’ny mpanao fihetsiketsehana mivondrona ao amin’ny fikambanana Fagnomba, etsy an-daniny, ary ny orinasa Fasimainty (QMM) miaraka amin’ny fiadidiana ny Faritra Anôsy , etsy an-kilany. Ny fitoriana napetraky ny an-daniny sy ny an-kilany mikasika ny fifanolanana misy eo amin’izy ireo no antony nandraisan’ny fitsarana ny raharaha.
Raha tsiahivina dia ny hetsika fitakiana ny nataon’ireo izay nalain’ny orin’asa fasimainty ny taniny miampy ireo mpanjono nampanantenaina tombon-tsoa kanefa milaza fa tsy nahazo izany no ifotoran’ny disadisa. Nisy ny sakan-dalana teo amin’ny faritry ny “4 chemins” izay efa nanomboka iray volana lasa zay mbola mitohy haramin’izao. Sakan-dàlana izay nahatonga ny fijanonan’ny asan’ny orinasa fasimainty nandritra ny herinandro. Tsy afaka nivezivezy ihany koa ireo fiara mivoaka sy miditra tao Mandena, toerana misy ny birao sy ny toerana fitrandrahana fasimainty any Tolagnaro nandritra io herinandro io. Nikatso arak’izany ny asa ka nahatonga fatiantoka betsaka ho an’ny orinasa, araka ny nambaran’ny tomponandraikitry ao amin’izany orin’asa izany. Marihina fa nisy mihintsy ny voasambotra noho ny fifandonana nisy teo amin’ny mpitandro ny filaminana sy ireo mpanao fihetsiketsehana avy amin’ny fikambanana Fagnomba. Nitory tany amin’ny fitsarana vokatr’izany ny orin’asa QMM sy ny Fiadidiana ny faritr’Anôsy.
Mifanilika andraikitra
Marihina fa taorian’ny fanaka ambavany ireo mpanao sakana ireo tany amin’ny mpitandron’ny filaminana, dia fantatra izao fa ny talata 5 mars izao no hiakatra fitsarana ny raharaha. Marihina fa nitory tany amin’ny fitsarana ihany koa ny hetsika Fagnomba noho ny voalazan’izy ireo fa herisetra nataon’ny mpitandro ny filaminana tamin’izy ireo. Tondroin’izy ireo ho tompon’antoka tamin’ny fandefasana mpitandro filaminana nandratra vahoaka nandritra ny fihetsiketsehana nataon’ny fikambanana Fagnomba ny lehiben’ny faritra Anôsy. Fitsarana anisan’ny andrasan’ny mpanara-baovao any Tolagnaro fatratra amin’io herinandro mitsidika io. Marihina fa mbola tantara hafa ihany koa ny halatra nitranga tao amin’ny tranoben’ny faritra Anôsy. Araka ny loharanom-baovao dia mifanilika andraikitra mikasika izay tompon’antoka tamin’ny fahavakisan’ny birao ny fikambanana Fagnomba sy ny fiadidian’ny faritra. Efa mandeha kosa ny fanadihadiana ataon’ny mpitandro filaminana manoloana ity raharaha ity.