Hitory ny JDS ireo olona 400 voafitaka

05/03/2013

Nanao hetsika teo anoloan’ny biraon’ny orinasa JDS etsy Talatamaty ireo olona miisa 400 mahery izay nifampiraharaha tamin’ny tompon’ity orinasa ity kanefa tsy tanteraka mandrak’izao ny fifanarahana. Nilaza ho mandefa mpiasa hiasa any amin’ny Nosy Maorisy ny tompon’ity orin’asa ity ka nangalany vola 300 000 ariary isan’olona ireo izay nangataka izany asa izany. Tamin’ny volana janoary tamin’ny taona 2012 no nampanantenany fa handehanan’izy ireo ho any Maorisy kanefa hatramin’izao dia mbola tsy lasa ihany. Hitondra ny raharaha eo amin’ny mpanara-maso ny asa eto Madagasikara ireto olona ireto.

Voafitaka. Miisa 400 ireo olona tezitra amin’ilay Maorisiana, Jacques Henri Veerafame, tompon’ny orinasa JDS etsy Talatamaty. Araka ny nambaran’izy ireo dia milaza ny mampiditra mpiasa ary mandefa azy ireo any amina orinasa eo amin’ny sehatry ny lamba any amin’ity Nosy ity ilay vahiny. Milaza ho manome fihofanana manandrify izany ihany koa izy amin’ny alalan’io orinasany io. Efa hatramin’ny taona2012 no nifanaraka taminy ireto teratany Malagasy ireto ary nomeny fampanantenana fa halefa ho any Maorisy. Vola 300 000 ariary isan’olona no nalaina tamin’izy ireo. Ho fikarakarana ny atontan-taratasy ho azy ireo isan’isany avy no nambara fa antony nakana izany vola izany. Nampanantena ihany koa ity tompon’ny orinasa JDS ity fa hikarama 600 000 ariary isam-bolana ireo mpiasa ireo rehefa tonga any amin’ny Nosy Maorisy.
Tsy hita ny misy azy
Hatramin’izao anefa dia tsy mbola lasa izy ireo. Tamin’ny 17 mars tamin’ny taona 2012 no nambara tamin’izy ireo tamin’ny voalohany fa daty handehanan’izy ireo miala eto Madagasikara ho any Maorisy. Nihemotra ny 15 avrily 2012 izany avy eo. Dia mbola nihemotra ny 30 mai indray. Nihemotra hatrany ny daty, araka ny fitarainan’ireo mpiasa ireo. Amin’izao fotoana izao dia tsy tazatazana teny amin’ity orinasa ity intsony ilay Maorisiana, ary tsy hita ihany koa ny tena misy azy marina. Teo anatrehan’izany dia tapa-kevitra ny hanao hetsika ireo olona miisa 400 izay matsiaro voafitak’ity teretany vahiny ity. Nanampy isa azy ireo ihany koa ireo mpiasa mpitantsoratra miiasa 4 tao amin’ny orinasa izany nilaza fa tsy nandray vola tamin’ny volana febroary teo. Fitokonana teo anoloan’ny biraon’ny JDS no nataon’izy ireo tamin’ny asabotsy. Nambaran’izy ireo ihany koa fa hanantona ny “Inspection de travail” izy ireo amin’ity herinandro ity, hametraka fitarainana manoloana ity raharaha ity.
Tsara ny manamarika fa tamin’ny volana novambra tamin’ny taon-dasa dia nandefa efa nandefa mpiasa tany amin’ny Nosy Maorisy ity orinasa ity. Io ihany hatramin’izay no andiana mpiasa nalefany tany amin’izany firenena izany. Miisa 28 ny mpiasa nalefany tamin’io fotoana io.