“Tena tsy rariny loatra amin’ny maha olombelona”

05/03/2013

Araka ny efa nanapoizana azy dia niditra mivantana tamin’ny antso an-telefaonina nandritra ny hetsiky ny ankolafy Ravalomanana teny amin’ny Magro tamin’ny asabotsy teo ny vadin’ny filoha teo aloha, Lalao Ravalomanana. Nandritra izany fidirany mivantana izany no nanambarany ny halahelony manoloana ny fihetsiky ny mpitondra tetezamita tamin’ny fanakanana azy tsy hody an-tanindrazana hitsabo ny reniny marary eny amin’ny hopitaly. Toy izao ny nambaran-dRamatoa Lalao Ravalomanana nandritra izany fidirany mivantana tao amin’ny Magro izany: « ry vahoaka Malagasy.

Misaotra an’Andriamanitra lehibe isika noho ny fahafahako miresaka mivantana aminareo izao. Fantantsika fa homba antsika mandrakariva izy. Tsy hiresaka politika aminareo aho androany fa tsy aritro mihitsy ny tsy hilaza aminareo ny zavamarina mitranga sy misy. Marary mafy ny reniko, Bebe Razay, mbola any amin’ny hopitaly izy amin’isika miresaka izao. Tsy afaka miteny, tsy afaka mitsangana. Malahelo tokoa aho ary tohina noho izany. Efa an-taonany aho no nahita noho ny tsy fidiny nahazo anay, iarahantsika mahalala izany. Nahazo filazana izahay tamin’ny Talata fa mahazo mody hitsabo ny reniko aho. Efa vonona ny rehetra ary efa azo ny billet. Efa teny amin’ny aeroport ny Zoma tamin’ny 8 maraina. Tampoka teo dia nisy filazana avy amin’ny Air Link, izay nisy taratasy avy amin’ny ACM milaza fa tsy hahazo tonga any ny fiaramanidina. Kepoka tanteraka aho no nalahelo mafy.Tena tsy rariny loatra amin’ny maha olombelona indrindra amin’ny maha reny. Aiza ny zo aman-kasina ary ny fihavanana maha Malagasy. Nanao izay azony atao ny protocole ary naseho azy ny taratasy avy amin’ny Praiministra manamafy ny fanomezan-dalana ahy ho hody. Isaorako azy tokoa izany. Izay ny zava-marina sy nisy, ka ampitao amin’ny Vahoaka Malagasy rehetra. Dia manao veloma mandra-pihaona, fa tena mbola feno dia feno ny foko, fa holazaiko aminareo ihany ny tohiny. Hombantsika mandrakariva andriamanitra».