Halefa aty Madagasikara

05/03/2013

Lehibena tamba-jotra iray mpandefa entana halatra mankaty Madagasikara no niakatra fitsarana tatsy amin’ny Nosy La Réunion tamin’ny faran’ny herinandro teo. Fiara sy kosakosana fiarakodia na entana hafa toy ny solosaina izay nangalarina tany amin’ity Nosy ity no ataon’ity tambajotra ity anaty kaontenera ary alefany aty Madagasikara hamidy. Nohelohin’ny fitsarana tany La Réunion higatra efa-taona an-tranomaizina ilay vehivavy voalaza fa atidohan’ity tamba-jotra ity.

Efa hatramin’ny taona 2011 no efa nanara-maso akaiky ity tamba-jotra ity ny mpitandro filaminana tao amin’ny Nosy La Réunion. Araka ny tatitra azon’ireo mpitandro filaminana dia misy vehivevy iray, miaraka amin’ny anadahiny izay mividy ireo entana halatra na entana avy amin’ireo mpamaky trano any La Réunion ary manondrana izany aty Madagasikara. Tamin’ny alalan’ny fihainoan’ny mpitandro filaminana ny fifandraisana an-telefaonina ataon’ireo olona narahi-maso ireo no nahitany fa tena nisy tokoa ny fifandraisan’izy ireo tamina mpamaky trano sy mpangalatra tany an-toerana. Eo anelanelan’ny 3000 ka hatramin’ny 4000 euro no ividianan’izy ireo ny fiara halatra iray. Manodidina ny 1000 euro kosa no ividianany ny firavaka sy fitaovana samihafa. Matetika dia izy mianadahy voalaza etsy ambony mihintsy no manondro ny fiara na entana tokony hangalarin’ireo mpiara-miasa amin’izy ireo. Izy ireo ihany koa no mampiditra ireo entana halatra ao anaty kontenera izay handefasana azy aty Madagasikara. Any Nosybe sy Antsiranana no hivantanan’ny entana alefan’ity tamba-jotra ity.
Naharitra ora maromaro ny fitsarana ireo olona tafiditra tamin’ity raharaha fanondranana entana halatra aty Madagasikara ity. Fitsarana izay natao tatsy amin’ny Nosy La Réunion, mazava loatra. Taorian’ny fandinihina ny raharaha dia nandry fanampahan-kevitra ny fitsarana. Sazy higadra an-tranomaizina mandritra ny efatra taona sazy mihantra, ary mandoha vola 18 000 euro no sazy azon’ilay vehivavy mizaka ny zompirenena Malagasy sy frantsay izay voatondro ho atidoha mikotrika ity raharaha ity. Voasazy higadra roa taona an-tranomaizina, sazy mihantona ary handoha vola 3000 euro kosa ilay anadahiny. Voasazy higadra herintaona an-tranomaizina ka ny folo volana dia sazy mihantona kosa ireo mpamaky trano sy mpangalatra niara-niasa tamin’izy mianadahy ireto.