Fandikan-dalana diso tafahoatra

05/03/2013

Tiana ny manamarika ety am-boalohany fa tsy fiarovana ireo olon-dratsy na ireo mpamono olona velively no hanoratana ity lahatsoratra ity fa ho fanairana ny sain’ireo mpitsara, manampahefana, tomponandraikitra ambony, avara-pianarana, mpanao politika, ireo fikambanana mpiaro ny zon’olombelona, ny fianakaviambe iraisam-pirenena, manoloana ny fanamparam-pahefana diso tafahoatra ataon’ny miaramila eto Madagasikara. Marina tokoa fa miankina loatra amin’ny Tafika ity fitondrana Tetezamita ity, kanefa kosa heverina fa tsy azo ekena intsony ny fihetsiky ny miaramila amin’izao fotoana. Toa mangiana eo anetrahan’izany anefa ny mpitandro filaminana, indrindra ny CIRGN, manaiky izao trangan-javatra tsy fahita eto ambonin’ny tany heverina ho tan-dalana izao.

Fitànana an-keriny
Ny BSP dia tsy mpitandro filaminana nanao fihanianana hanao fanadihadiana (police judiciaire) kanefa dia misambotra olona tsotra izao. Teny an-dalambe avokoa ve no nisamboran’ny miaramilan’ny BSP ireo olona enina voalaza fa namono ilay “sergent »? Raha tsy izany mantsy dia ilàna ny antsoina hoe “mandat de perquisition” avy amin’ny Fampanoavana, ankoatra ny didy fampisamborana (mandat d’arrêt). Tsy vitan’izany fa notànana telo andro mahery tao amin’ny BSP ireo olona ireo raha 48 ora no voalazan’ny lalàna velona ahafana mitàna olona iray. Dila izany fe-potoana izany dia tsy maintsy mangataka fanalavana (prolongatio de garde à vue) avy amin’ny Fitsarana. Mazava ho azy fa fitànana an-keriny (séquestration) no nataon’ny BSP ary azo henjehina manoloana izany fandikan-dalana izany izy ireo.
Vono sy ratra niniana natao
Tsy vitan’ny hoe nisambotra olona tsy nahazo alàlana sy nitàna olona an-keriny ny BSP fa mbola nanao vono sy ratra niniana natao ihany koa (coups et blessures volontaires), heloka henjehan’ny Fehezan-dalana Famaizana, ireto andiana miaramila manokana mpanofana ireo mpiambina tomponandraiki-panjakana ambony ireto. Mampihoron-koditra tanteraka ny zava-misy satria dia sahin’ny BSP ny nampiantso hainoamanjery ; toa nidera izany avokoa ny ankamaroan’ny gazety niresaka ity fisamborana ireo olona heverina ho namono nahafaty ilay « sergent » mpiambina minisitra ; mampihoron-koditra ihany koa ny fahanginan’ny Fitsarana eo anatrehan’izao fandikdan-dalana mibaribary izao.
Fitsaram-bahoaka
Eken’ny mpitandro filaminana sy ny Fitsarana àry ve rahatoa ka misy fianakaviana iray misambotra olona heveriny ho namono ny havany, mitàna an-keriny izany olona izany mandritra ny andro maromaro, miroso amin’ny fampiasan-kery sy vono mba hitenenan’ity farany izay namany na ireo mpiray tsikombakomba aminy, izay vao manolotra azy rehetra eo anatrehan’izany mpitandro filaminana ? Inona no maha samy hafa ny fihetsiky ny BSP amin’ny fitsaram-bahoaka ? Mbola tany tan-dalana ve ity Madagasikara ity ary misy mpitondra marina tokoa ve?