Hitokona indray ny mpiasa

05/03/2013

Hanakatom-baravarana indray ny Banky BFV amin’ity androany ity, raha araka ny vaovao avy amin’ireo mpiasa ao amin’izany Banky izany. Nambaran’izy ireo fa tsy mbola tanteraka hatramin’izao ny fitakian’izy ireo izay efa nanaovany fitokonana fanairana, herinandro vitsivitsy lasa izay. Eo anatrehan’izany tsy fatanterahan’ny fitakian’izy ireo izany dia nanapa-kevitra ny hampitsahatra ny asany indray izy ireo ary ao anatin’ny fotoana tsy voafetra no hanatanterahan’izy ireo izany.

Ny loharanom-baovao avy amin’ireo mpiasa ihany koa no nahafantarana fa ny fitakiana fisondrotan-karama no tena ifotoran’ny fitakian’ny mpiasan’ny Banky BFV SG manerana ny Nosy. Mitaky ny hampifanandrifiana amin’ny tombom-barotry ny Banky ny fisondrotan-karaman’izy ireo ny mpiasa. Araka ny voalaza dia 20% no fisondrotan-karama notakian’izy ireo tamin’ny fiandohan’ny taona. Tsy nisy afa-tsy 6% anefa no nomenan’ny banky azy ireo. Nisy ny fifanantonana teo amin’ireo mpiasa mitokona sy ny fitantanana ny Banky. Tamin’izany fihaonana izany dia efa nanemotra ho 15% ny fitakiana fisondrotan-karaman’izy ireo ny mpiasa mitokona. Niziriziry tamin’ny 6% hatrany anefa ny mpampiasa ka izay no isan’ny anton’izao fiverenan’ny fitokonana izao. Marihina fa araka ny nambaran’ny mpiasa dia nahatratra 4% ny tombom-barotra azon’ny Banky rah any taona 2012 no resahina. Akoatry ny fisondrotan-karama dia mitaky tombon-tsoa hafa ihany koa ny mpiasa. Isan’izany ny mba tsy hitakiana zana-bola tahaka ny takiana amin’ny mpanjifa tsotra azy ireo. Mitaky ny fanatsarana ny sosialin’ny mpiasa ihany koa ireo mpitokona.
Tsara ny mampatsiahy fa niteraka fikorontanana betsaka teo amin’ireo mpanjifa ny fisian’ny fitokonan’ny mpiasa farany teo tao amin’ity Banky ity. Isan’ny voa mafy tamin’izany ihany koa ireo orin’asa izay manankina amin’ity banky ity ny fitantanam-bola ao aminy. Tsy isalasalana arak’izany ny mety hisian’ireo mpanjifa ho kivy ka hiafara amin’ny fanapahana ny fiaraha-miasa amin’izany banky izany.