Nampahantran’ny tetezamita ny vahoaka Malagasy

27/10/2012

Tsy niolakolaka ny fanambaran’ny tatitry ny Banky iraisam-pirenena momba ny zava-misy eto Madagasikara amin’izao fotoana izao. Arakan y voalaza ao amin’io tatitra io dia izao fitondranatetezamita izao no rangory fototry ny afo mahatonga ny fahantrana lalina mahazo ny an-kamaroan’ny vahoaka Malagasy amin’izao fotoana izao. Manondro mena avokoa amin’izao fotoana izao ireo tondro momba ny fiainam-bahoaka, hoy ihany ny fanambaran’ity tatitra ity, mitontongana ihany koa ny fotodrafitr’asa ary tsy afa-miaro-tena manoloana ireo loza voajanahary toy ny rivo-doza intsony ny

firenentsika. Mbola tsy azo antoka ihany koa ny hisian’ny fiakaran’ny farim-piainana amin’ny taona hoa avy.Nitombo 4 tapitrisa ny isan’ny Malagasy tafalatsaka ao anaty fahantrana lalina hatramin’ny taona 2008 no mankaty. Izay no isan’ny nisongadina tamin’ny tatitra nataon’ny Banky Iraisam-pirenena mahakasika ny zava-misy ara-toe-karena sy ara-piaraha-monina eto madagasikara amin’izao fotoana izao. Nitotongana avokoa ireo tondra rehetra mahakasika ny fiainam-bahoaka teo anelanelan’io vanim-potoana io, raha araka ny filazan’ity tatitry ny Banky iraisam-pirenena ity ihany. Raha io elanelam-potoana io no resahana dia mazava loatra fa ny fotoana nitondran’ny filohan’ny tetezamita ny tany sy ny fanjakana izany. Izany hoe fotoana manandrify ny fanonganam-panjakana nahatonga izao tetezamita izao. Raha tsorina dia tondroin’ny tatitry ny Banky Iraisam-pirenena ho tompon’antoka amin’izao fahoriam-bahoaka izao ny mpitondra ny Tetezamita.
Mbola ity tatitra ity ihany koa no nanamarika fa i Madagasikara amin’izao fotoana izao no firenena mahantra indrindra eto ambonin’ny tany. Satria na i Rwanda izay firenena rotiky ny ady an-trano aza dia efa nahitana fidinana 9% ny tahan’ny fahantrana any aminy amin’izao fotoana izao.
Ho an’I Madagasikara dia nihemotra any amin’ny taha mifanandrify amin’izay nisy tamin’ny taona 2002 ny fahafaha-mividin’ny vahoaka. Izany hoe nisy ny fandrosoan’ny firenena hatramin’ny taona 2002 ka hatramin’ny taona 2008 fa hatreo dia nihemotra lavitra indray izy.
Lafin-javatra vitsivitsy eo amin’ny fiainam-bahoaka no namaritan’ny Banky Iraisam-pirenena ny fisian’izay fitongonganan’ny fiainam-bahoaka eto Madagasikara izay. Isan’izany ny tsy fahafahan’ny firenena intsony miantoka ny fahamarinan-toeran’ny harinkarena izay tsy mitsaha-mitontongana amin’izao fotoana izao. Eo ihany koa ny fahapotehan’ireo fotodrafitr’asambahoaka: toy ny lalana sy ny hafa. Isan’izany ihany koa ny fitotongan’ny fahafahan’ny firenena miatrika ireny loza voajanahary toy ny rivo-doza sy ny valan’aretina ireny.
Nomarihan’ity tatitra momba ny teo-karena eto Madagasikara ity ihany koa fa tsy mbola azo antoka hatreto ny hisian’ny fivoarana ara-toe-karena eto amintsika. Ny fisian’ireo tetik’asa momba ny fitrandrahana harena an-kibon’ny tany no hany mety ho fanohitra amin’izany kanefa raha tsy misy ny fivoahana amin’ny krizy dia tsy hitondra vokan-tsoa eo amin’ny fiain’m-pirenena amin’ny ankapobeny izany.
Isan-telo volana no mamoaka tatitra momba an’i Madagasikara ny Banky iraisam-pirenana. Ity farany ity dia izay nivoaka amin’izao vola oktobra izao.