Tombanana ho 400 tapitrisa ariary ny vidiny

06/03/2013

Tany amin’ny tanana iray tao anatin’ny kaomina Tsinjoarivo 22 any amin’ny distrikan’i Fenoarivobe, faritra Bongolava no nahitana mpiandry omby iray ity vatosoa saro-bidy ity. “Quartz fumé” no karazan’izany vato izany izay milanja 6 taonina ary mirefy 6 metatra ny manodidina azy. Vato sarobidy izay tsy mbola fahita tany an-toerana ity nipoitra tampoka nasehon’ny riaka ity izay azo tombanana ho 400 tapitrisa ariary any ho any ny vidiny. Notenenin’ilay mpiandry omby tamin’ny namany ny fisian’ilay vato ary ity farany no nitady olona hividy azy. Orinasana teratany Sinoa roa samihafa izay samy tsy manana fahazoan-dalana hitrandraka na hividy vato eto Madagasikara no efa nidina tany an-toerana saika hividy ity vato sarobidy ity ary efa nisy nanome vodiondrim-barotra nefa lasa niteraka savorovoro sy fifanolanana ny raharaha.

Ny asabotsy 02 marsa 2013 teo no nidina tany an-toerana hijery ifotony ny tena zava-misy marina ny avy ao amin’ny “Police des mines” avy aty Antananarivo, notarihin’i Lieutenant-Colonel Behivoka Fiederch. Taorian’ny fifampidinihana tamin’ireo tompon’andraikim-panjakana tao an-toerana dia nandeha tany amin’ny toerana misy ilay vato izay lavitra sy tsy tongan’ny fiara. Nampahafantatra ireo mponina tany an-toerana ny mba hanarahan’izy ireo ny lalàna mifehy ny fitrandrahana harena an-kibon’ny tany izy ireo. Nisy ihany koa ny fampianarana an’ireo zandary ny tokony hatao rehetra manoloana ny fandikan-dalàna momba ny fitrandrahana na fitanterana ireo harena sarobidy eto amitsika.
Araka ny loharanom-baovao avy ao amin’ny zandarmariam-pirenena dia nogiazana aloha ao amin’ny Poste Avancé ao Tsinjoarivo 22 ilay vato ka nankinina ny zandary ny fiambenana azy alohan’ny hitondrana izany aty Andrenivohitra. Marihina fa samy tsy manana taratasy ireto orin’asa sinoa roa izay miady hividy ity vato ity kanefa efa manamboatra sy mamorona lalana mba hahafahana maka ilay vato sarobidy.
Ny “Police des mines” dia maneho fisaorana an’ireo tomponandraikitra rehetra tsy an-kanavaka any an-toerana tamin’ny fandraisan’izy ireo andraikitra ka afaka nisoroka ny korontana sy nitandro ny filaminana teo anatrehan’ity raharaha ity.