Hanao hetsika “Taniketsa” ny DRJS

06/03/2013

Hatao ao anatin’ny faritra Antsinanana sy ny Faritra Analanjirofo ny 2 ka hatramin’ny 5 aprily ho avy izao ny hetsika tafiditra amin’ilay hetsika fantatra amin’ny anarana hoe “taniketsan’ny fanatanjahan-tena malagasy”. Hatsika izay karakarain’ny ministeran’ny Fanatanjahan-tena sy ny alavoly. Ny talem-paritry ny tanora sy ny alavoly ary ny fanatanjahan-tena ao Toamasina no tompon’antoka amin’ity hetsika ity any an-toerana. Niantso mpanao gazety nanazava ny fepetra mikasika izany hetsika izany ary izy ireo omaly. Nandritra ity fihaonana tamin’ny mpanao gazety ity no nilazana fa ny “fitiliana ifotony ireo tanora tena hanome lanja ny fanatanjahan-tena Malagasy atsy ho atsy no tanjona amin’izao ezaky ny minisitera izao.

Tsy ny fahaizana loatra no jerena mandritra izany, fa ny habe sy ny halavana ary ny fahatanorana araka ny fepetra napetraka fotsiny ihany”, araka ny fanazavan’i Rabarivelo Laurent talen’ny DRJS Toamasina.. Tao anatin’ny faritra 12 voafidy ny faritra Atsinanana sy ny faritra Analanjorofo. Ny 02 – 05 aprily izao ny fifantenana ho an’i Toamasina, izay samy hialoavan’ny fisivanana izany isaky ny kaominina sy ny distrika 13 (07 faritra atsinanana, 06 faritra analanjorofo) araka ny toro-marika azon’izy ireo avy. Ho an’i Toamasina I dia anio manontolo no andro hanaovana izany eo anivon’ny foiben’ny rejionaly tanora sy fanatanjahan-tena (CRJS). Taranja telo no handraisan’ireo mpifaninana anjara, dia ny Basket-Ball sy ny Athletisme ho an’ny tanora lahy sy tanora vavy, ny Foot-Ball kosa ho an’ny tanora lahy ihany. Mila manana halavana 1,65m ho an’ny tovovavy sy 1,70m ho an’ny tovolahy ary latsaka ny 16 taona ho an’ny Basket-Ball sy latsaky ny 14 taona ho an’ny Foot-Ball. Ho an’ireo misafidy ny Athletisme kosa dia “triathlon” no hitiliana azy ireo, izay ahitana ny hazakazaka 50m na 1.000m, eo amin’ny vikin-dava na ny viki-miakatra, ary poids na javelot.
Marihina fa efa eo am-pananganana ny komity misahana ny fanomanana sy ny fanaraha-maso ary fanamarihana ireo tanora mpandray anjara ny DRJS amin’izao fotoana izao. Tanora lahy sy vavy 300 no andrasana ao Toamasina ny fiandohan’ny volana aprily, ka 60 amin’ireo tanora ireo izay mahafeno ny fepetra napetraka no ho tsongaina ka hiatrika ny fanofanana azy ireo mandritra ny fialan-tsasatra lehibe. Efa vonona avokoa ny kianja sy ny fandraisana ireo tanora ireo ao Toamasina, satria ny kaominina sy ny distrika ary ny faritra nivoahan’ilay tanora ihany no miantoka ny saran-dalany ho tonga ao Toamasina hiatrika ny fifanintsanana.