Namono olona ny fitondrana HAT

07/03/2013

Tsy mety milamina mihitsy ao Mandritsara hatramin’ny omaly araka ny angom-baovao azo avy any an-toerana. Nobahanan’ny olona tamin’ny vatan-kazo sy vato be ny seranam-piaramanidina. Tsy afaka niainga vokatr’izany ny fiaramanidina nitondra ireo delegasiona avy amin’ny mpitondra HAT, raha tsy tany amin’ny 13h30mn. Nobahanan’ny olona tamin’ny fatina traktera sy fatim-by ihany koa ny arabe mihazo ny seranana ho mariky ny haterezan’ny vahoaka any an-toerana. Nirefodrefotra noho izany ny basy ary dia velona korontana. Nigadona tany an-toerana tokoa mantsy ireo mambra avy ao amin’ny governemanta, taorian’ny rotaka nitranga tao Mandritsara vokatry ny famonoan’ny sasany ilay relijiozy vahiny. Nihitatra anefa ny raharaha ary nivadika ho fihetsiketseham-bahoaka. Vokany, nitifitra ny fitondrana, maty noho izany ny mpianatra iray ao amin’ny kilasy famaranana (Terminal A). Toa hoe nisy mpianatra iray hafa maty nandritra izany tifitra vary raraka nataon’ny fitondrana izany koa saingy tsy hita izay nanjavonany hatramin’izao.

Fitakiana roa sosona
Mitaky ny hamoahan’ny fitondrana ny fatin’ilay mpianatra voalaza etsy ambony fa tsy hita nanjavonana ny vahoaka ao Mandritsara. Isan’ireo fitakiana roa sosona nahatonga ny savorovoro omaly izany, araka ny loharanom-baovao. Mitaky ny hanolorana ireo olona telo voarohirohy ho namono ilay relijiozy izay efa nafindra toerana any Tsiafahy koa mantsy ny mponina any an-toerana. Midika izany fa tsy matoky intsony ny fitondrana ny vahoakan’i Mandritsara; lasa fomba fanao tato ho ato mantsy ity fitsaram-bahoaka ity, tahaka ny nataon’ireo miaramila avy ao amin’ny BSP Mahazoarivo. Hatahorana araka izan yny mety hitaran’ny korontana any an-toerana mandritra ny andro maromaro, mandra-pahitana ity hoe mpianatra iray maty notifirin’ny fitondrana ity.
Ary ny fifidianana?
Miantefa any amin’ny fifidianana avy hatrany ny adihevitra eo anatrehan’izao trangan-javatra izao. Tsy maintsy hanelingelina ny fanomanana izany fifidianana izany mantsy ny zava-misy any Mandritsara, ankoatra ny takaitra navelan’ny rivodoza tany Toliara. Mampametra-panontaniana ny fivoaran’ny toe-draharaham-pirenena; iza no manana tombotsoa hisian’ny korontana tsy hahatanteraka ny fifidianana? Ireo antoko politika efa manana ny kandidany ve na ireo kandidà efa nanambara ampahibemaso ny fahavononany hiatrika izany hazakazaka masina izany? Toa sarotra ihany ny hino fa mbola manam-pikasana hanemotra ny datim-pifidianana izy ireo; ny fifidianana rahateo koa no hany lalana hivoahana amin’izao krizy izao sy hamaranana haingana ny Tetezamita.